ബിലാലിന്​ കാഴ്ച തിരിച്ചുകിട്ടുമെന്ന പ്രതീക്ഷയിൽ കുടുംബം

പൊലീസിനെതിരെ നിയമനപടിക്ക്​ നീക്കം തൊടുപുഴ: പ്രതിഷേധ മാർച്ചിനിടെ പൊലീസിന്‍റെ ലാത്തിയടിയിൽ കണ്ണിന്​ ഗുരുതര പരിക്കേറ്റ യൂത്ത്​ കോൺഗ്രസ്​ ഇടുക്കി ജില്ല ജനറൽ സെക്രട്ടറി ബിലാൽ സമദിന്​​ കാഴ്ച തിരിച്ചുകിട്ടുമെന്ന പ്രതീക്ഷയിൽ കുടുംബം. താൽക്കാലികമായി നഷ്ടപ്പെട്ട കാഴ്ച വിദഗ്​ധ ചികിത്സയിലൂടെ തിരിച്ചുകിട്ടുമെന്നാണ്​ പ്രതീക്ഷ​. ഒരു വർഷത്തോളം നീളുന്ന തുടർചികിത്സക്ക്​ ​ശേഷമേ ഇക്കാര്യത്തിൽ അന്തിമ തീരുമാനത്തിലെത്താനാകൂ എന്നാണ്​ അങ്കമാലിയിലെ സ്വകാര്യ ആശുപത്രിയിലെ ഡോക്ടർമാർ പറയുന്നത്​. ഡി.സി.സി അധ്യക്ഷനെ ആക്രമിച്ചവരെ അറസ്റ്റ്​ ചെയ്യണമെന്ന്​ ആവശ്യപ്പെട്ട്​ ചൊവ്വാഴ്ച തൊടുപുഴയിൽ നടത്തിയ മാർച്ചിനിടെയാണ്​ ബിലാലിന്​ ലാത്തിയടിയേറ്റത്​. ഇടത്​ കണ്ണിനടിയേറ്റ്​ നിലത്തുവീണ ബിലാലിന്‍റെ തലയും അടിയേറ്റ്​ പൊട്ടി. കണ്ണിന്‍റെ ഇരു പോളകളിലുമായി 28ഉം തലയിൽ എട്ടും തുന്നലുകളുണ്ട്​. കണ്ണിന്‍റെ ഞരമ്പുകൾക്കും ലെൻസിനും ഗുരുതര ക്ഷതമേറ്റതാണ്​ കാഴ്ചശക്തി നഷ്ടപ്പെടാൻ കാരണം. കൺപോളകൾ അടക്കാൻ സഹായിക്കുന്ന പേശികൾക്കും തകരാറുണ്ട്​. വിദഗ്​ധ ചികിത്സക്കായി മധുരയിലേക്ക്​ കൊണ്ടുപോകാനുള്ള ആലോചനയിലാണ്​ കുടുംബം. ഇതിനിടെ, ലാത്തിച്ചാർജ്​ സംബന്ധിച്ച മാർഗനിർദേശങ്ങൾ പാലിക്കാതെ ബിലാലിന്‍റെ കണ്ണ്​ അടിച്ചുതകർത്ത പൊലീസ്​ ഉദ്യോഗസ്ഥർക്കെതിരെ നിയമനടപടി സ്വീകരിക്കുമെന്ന്​ സഹോദരൻ അസ്​ലം പറഞ്ഞു. ലാത്തിച്ചാർജിന്‍റെ വിഡിയോ ദൃശ്യങ്ങളടക്കം തെളിവുകൾ ശേഖരിച്ചിട്ടുണ്ട്​. കോൺഗ്രസ്​ നേതൃത്വവുമായി ആലോചിച്ചാകും ഇക്കാര്യത്തിൽ തുടർനടപടികൾ തീരുമാനിക്കുക. ചിത്രം: TDG Bilal ആശുപത്രിയിൽ ചികിത്സയിൽ കഴിയുന്ന ബിലാൽ സമദ്​