ഇടുക്കി ഡി.സി.സി പ്രസിഡന്‍റിന്​ നേർക്ക്​ ആക്രമണം; ആശുപത്രിയിൽ പ്രവേശിപ്പിച്ചു

​​​ രാത്രി പൊലീസ്​ സ്​റ്റേഷന്​ മുന്നിൽ കോൺഗ്രസ്​ പ്രവർത്തകരുടെ കുത്തിയിരിപ്പ്​ തൊടുപുഴ: ഇടുക്കി ഡി.സി.സി പ്രസിഡന്‍റ്​ സി.പി. മാത്യുവിന്​​ നേരേ ഡി.വൈ.എഫ്.ഐ ആക്രമണം. നെറ്റിയിലും തലയ്ക്കും പരിക്കേറ്റ അദ്ദേഹത്തെ സ്വകാര്യ ആശുപത്രിയിൽ പ്രവേശിപ്പിച്ചു. തിങ്കളാഴ്ച രാത്രി എട്ടരയോടെ തൊടുപുഴ ഗാന്ധി സ്ക്വയറിലാണ്​ സംഭവം. കോൺഗ്രസ് നേതാക്കളെ ഡൽഹി പൊലീസ് കൈയേറ്റം ചെയ്തതിൽ പ്രതിഷേധിച്ച്‌ ഡി.സി.സി നേതൃത്വത്തിൽ മുട്ടത്ത് നടന്ന യോഗത്തിൽ പങ്കെടുത്ത് തൊടുപുഴ രാജീവ് ഭവനിലേക്ക് മടങ്ങുകയായിരുന്നു മാത്യു. ഈ സമയം തൊടുപുഴ ഗാന്ധി സ്ക്വയറിൽ മുഖ്യമന്ത്രിക്കെതിരെ വിമാനത്തിൽ പ്രതിഷേധിച്ചതിനെതിരെ ഡി.വൈ.എഫ്.ഐ നേതൃത്വത്തിൽ യോഗം നടക്കുകയായിരുന്നു. ഈ സമയം ഇവിടെയെത്തിയ മാത്യുവിന്‍റെ വാഹനം ഡി.വൈ.എഫ്.ഐ. പ്രവർത്തകർ തടഞ്ഞ്​ മർദിക്കുകയായിരുന്നു എന്ന് കോൺഗ്രസ് നേതാക്കൾ പറയുന്നു. അക്രമത്തിൽ കാറിന്​ കേടുപാടുണ്ട്. തുടർന്ന് അവിടെനിന്ന് വാഹനമോടിച്ച്‌ രക്ഷപ്പെടുകയായിരുന്നു. എന്നാൽ, ഡി.സി.സി. പ്രസിഡന്‍റിന്‍റെ കാർ പ്രകടനത്തിനിടയിലേക്ക് ഇടിച്ച്‌ കയറ്റി പ്രകോപനം സൃഷ്ടിക്കുകയായിരുന്നുവെന്ന് ഡി.വൈ.എഫ്.ഐ. ആരോപിച്ചു. ജില്ല ജോയന്റ് സെക്രട്ടറി അജയ് ചെറിയാൻ, ജില്ല വൈസ് പ്രസിഡന്‍റ്​ എം.എസ് ശരത്ത്, ബ്ലോക്ക്‌ കമ്മിറ്റി അംഗം ജെയിൻ കെ. രാജ് എന്നിവർക്ക് പരിക്കേറ്റതായും നേതാക്കൾ പറഞ്ഞു. ഇവരെ ആശുപത്രിയിൽ പ്രവേശിപ്പിച്ചു. ഡി.സി.സി പ്രസിഡന്‍റിനെ ആക്രമിച്ചവരെ അറസ്റ്റ്​ ചെയ്യണമെന്ന്​ ആവശ്യപ്പെട്ട്​ രാത്രി വൈകി തൊടുപുഴ പൊലീസ്​ സ്​റ്റേഷന്​ മുന്നിൽ കുത്തിയിരിപ്പ്​ തുടർന്നു. FOTO TDG CP MATHEW ഇടുക്കി ഡി.സി.സി. പ്രസിഡന്‍റ്​ സി.പി. മാത്യു സി.പി മാത്യു ആശുപത്രിയിൽ