ദേശീയപാതയോരത്ത് ദുർഗന്ധംപരത്തി മുട്ടത്തോടുകൾ

പൊൻകുന്നം: ദേശീയപാതയിൽ പൊൻകുന്നത്തിന് സമീപം കടുക്കാമല വളവിൽ മുട്ടലോറി മറിഞ്ഞതിനെ തുടർന്ന് റോഡിലും വഴിവക്കിലും റബർതോട്ടത്തിലും വീണ മുട്ടകൾ ചീഞ്ഞ്​ ദുർഗന്ധം പരക്കുന്നു. കഴിഞ്ഞ 31ന്​ രാത്രി പത്തരയോടെയാണ് തമിഴ് നാട്ടിലെ നാമക്കല്ലിൽനിന്ന്​ കോട്ടയം-ആലപ്പുഴ-ചേർത്തല ഭാഗത്തേക്കുപോയ ലോറി മറിഞ്ഞത്. ഇതിൽനിന്ന്​ തെറിച്ചുവീണ മുട്ടയുടെ തോട് ഇവിടമാകെ നിരന്നുകിടക്കുകയാണ്. ഇത് നീക്കംചെയ്യാൻ പഞ്ചായത്തോ മറ്റ്​ അധികാരികളോ ശ്രമിക്കുന്നില്ലെന്നാണ് ആക്ഷേപം. വാഹനങ്ങളിൽ സഞ്ചരിക്കുന്നവർക്കും കാൽനടക്കാർക്കും പരിസരത്ത് താമസിക്കുന്നവർക്കും റോഡിലെ മുട്ടത്തോടി‍ൻെറ ദുർഗന്ധം ദുരിതമാകുന്നു. മഴക്കാലമായതിനാൽ സാംക്രമിക രോഗത്തിനും സാധ്യതയുണ്ടെന്ന ആശങ്കയും നാട്ടുകാർക്കുണ്ട്. യാത്രക്കാർ മുക്കുപൊത്തിയാണ് ഇതുവഴി കടന്നുപോകുന്നത്. റോഡിൽ കുന്നുകൂടിയ കോഴിമുട്ട മാലിന്യം അടിയന്തമായി നീക്കണമെന്നയാവശ്യം ശക്തമാണ്​. KTL VZR 3 Egg Lorry ദേശീയപാതയിൽ പൊൻകുന്നം കടുക്കാമലയിൽ മുട്ടലോറി മറിഞ്ഞസ്ഥലത്ത് മുട്ടത്തോടുകൾ നിരന്നുകിടക്കുന്നു