സർക്കാറിന്‍റെ സർക്കുലർ പാലിച്ചുമാത്രം എസ്.സി ഷോപ്പിങ്​ കോംപ്ലക്‌സ്​ കടമുറികൾ അലോട്ട് ചെയ്യണമെന്ന് ഹൈകോടതി

കൊച്ചി: സർക്കാറിന്‍റെ സർക്കുലർ പാലിച്ചുമാത്രം കളമശ്ശേരി നഗരസഭയിലെ എസ്.സി ഷോപ്പിങ്​ കോംപ്ലക്‌സിലെ കടമുറികൾ അലോട്ട് ചെയ്യണമെന്ന് ഹൈകോടതി. പട്ടികജാതി വിഭാഗത്തിലുള്ളവർക്കുമാത്രമേ കടമുറികൾ നൽകാവൂവെന്ന സർക്കാർ സർക്കുലർ പാലിക്കണമെന്നാണ്​ ജസ്റ്റിസ്​ അനു ശിവരാമന്‍റെ ഉത്തരവ്​. സൗത്ത് കളമശ്ശേരിയിലെ ഷോപ്പിങ്​ കോംപ്ലക്‌സിലെ കടമുറികൾ അനർഹരായ വ്യക്തികൾക്ക് നൽകുന്നത്​ തടയണമെന്ന്​ ആവശ്യപ്പെട്ട് കളമശ്ശേരി സ്വദേശി ജി. ഗിരീഷ് ബാബു നൽകിയ ഹരജിയാണ്​ കോടതി പരിഗണിച്ചത്​. പട്ടികജാതി വിഭാഗത്തിലെ അഭ്യസ്തവിദ്യരും തൊഴിൽരഹിതരുമായ യുവജനങ്ങളുടെ തൊഴിൽ സംരംഭങ്ങൾക്ക് അവസരമൊരുക്കുകയെന്ന ലക്ഷ്യത്തോടെയാണ് നഗരസഭ ഷോപ്പിങ്​ കോംപ്ലക്‌സ് നിർമിച്ചതെന്ന്​ ഹരജിയിൽ പറയുന്നു. 12ാം പഞ്ചവത്സര പദ്ധതിയിലെ ആറുകോടി ചെലവിട്ട്​ നിർമിച്ച കോംപ്ലക്സിലെ മൂന്നാംനില മജിസ്ട്രേറ്റ്​ കോടതിക്ക് വിട്ടു നൽകിയിരുന്നു. താഴെ രണ്ടു നിലയിലായി 40 കടമുറികളാണുള്ളത്. ഇവക്കായി അപേക്ഷ നൽകിയവരിൽ 29 പേർ യോഗ്യതയുള്ളവരാണെന്ന് കണ്ടെത്തിയെന്നും പത്തുപേർ അയോഗ്യരാണെന്ന് വിലയിരുത്തിയതിനാൽ ഈ മുറികൾ വീണ്ടും അലോട്ട് ചെയ്യേണ്ടതുണ്ടെന്നുമായിരുന്നു നഗരസഭയുടെ വിശദീകരണം. തുടർന്നാണ് സർക്കാറിന്‍റെ സർക്കുലർ പാലിച്ച്​ കടമുറികൾ വിതരണം ചെയ്യാൻ കോടതി നിർദേശിച്ചത്​.