ഉത്തരവാദപ്പെട്ടവർ ഇല്ല; സർക്കാർ ഓഫിസുകൾ നോക്കുകുത്തി

-കോവിഡ്​ കാലത്ത്​ സേവനം കിട്ടാതെ ജനം ആലപ്പുഴ: കോവിഡിൽ ജനം ബുദ്ധിമുട്ടുമ്പോൾ പലയിടത്തും സർക്കാർ ഓഫിസുകളുമായി ബന്ധപ്പെട്ട അവശ്യസേവനങ്ങൾ ലഭിക്കാത്ത സ്ഥിതി. പ്രധാന തസ്തികകളിൽ ആളില്ലാത്തതു തന്നെ പ്രശ്​നം. ജനങ്ങൾ നേരിട്ട് ആശ്രയിക്കുന്ന ഓഫിസുകളാണ് മിക്കതും എന്നത്​ ക്ലേശം വർധിപ്പിക്കുന്നു. ചിലയിടങ്ങളിൽ താൽക്കാലിക ചുമതലയുള്ളവരുണ്ടെങ്കിലും ശാശ്വത പരിഹാരമില്ല. വില്ലേജ് ഓഫിസർ, കൃഷി ഓഫിസർ, ഹോമിയോ ഡോക്ടർ, ഹെൽത്ത് ഓഫിസർ, ഹെൽത്ത് ഇൻസ്പെക്ടർ, പഞ്ചായത്ത് സെക്രട്ടറി, എൽ.ആർ തഹസിൽദാർ, ക്ഷീരവികസന ഓഫിസർ, വെറ്ററിനറി ഡോക്ടർ, ജില്ല പഞ്ചായത്ത് എൻജിനീയർ തുടങ്ങി ജനങ്ങൾക്ക്​ ദിവസേനയെന്നോണം സേവനം ലഭിക്കേണ്ട തസ്​തികകളിൽ ഇരിക്കുന്നവരാണ്​ കസേരകളിൽ ഇല്ലാത്തത്​.​ എഴുപുന്നയിൽ ആറുമാസമായി വില്ലേജ്​ ഓഫിസറില്ല. വിസ്തൃതിയും ജനസംഖ്യയും കൂടുതലുള്ള വില്ലേജാണ്. ദിവസം നൂറിലേറെ അപേക്ഷകൾ എത്തുന്നു. വിദ്യാർഥികൾക്കു വരുമാനം, ജാതി, നേറ്റിവിറ്റി സർട്ടിഫിക്കറ്റുകൾ അത്യാവശ്യമുള്ള സമയം. വെളിയനാട്ട്​ ഒരു മാസമായി ഓഫിസറില്ല. സർട്ടിഫിക്കറ്റുകൾക്കും മറ്റും ജനങ്ങൾ പ്രയാസപ്പെടുന്നു. രാമങ്കരിയിലും ഇതുതന്നെ സ്ഥിതി. ചേർത്തല തെക്ക്: സ്ഥാനക്കയറ്റം ലഭിച്ചു പോയ ആൾക്കു പകരം നിയമനമായില്ല. ചേർത്തല വടക്ക് വില്ലേജ് ഓഫിസർക്ക് അധിക ചുമതല. കൃഷി ഓഫിസർ അമ്പലപ്പുഴ തെക്ക്: നാലുമാസമായി ആളില്ല. പാടശേഖര സമിതികളുടെ പ്രവർത്തനം നിരീക്ഷിക്കാൻ‍ കഴിയുന്നില്ല, ഡേറ്റ ബാങ്ക് സർട്ടിഫിക്കറ്റ് ലഭിക്കുന്നില്ല. കാർഷിക വികസന, കർമസേന സമിതികളുടെ യോഗങ്ങൾ ചേരാനും കഴിയുന്നില്ല. പുന്നപ്ര വടക്ക്: ഒന്നര മാസമായി ഒഴിവ്. പാടശേഖര സമിതികളുടെ പ്രവർത്തനം, ഡേറ്റ ബാങ്ക് സർട്ടിഫിക്കറ്റ് തുടങ്ങിയവ മുടങ്ങുന്നു. വിവിധ സമിതി യോഗങ്ങൾ ചേരാൻ കഴിഞ്ഞിട്ടില്ല. തലവടി: ഒരു വർഷത്തിലേറെയായി ആളില്ല. കർഷകരുടെ ആനുകൂല്യങ്ങൾ കിട്ടാൻ വൈകുന്നു. ചിങ്ങം ഒന്നിനു കർഷകദിന പരിപാടിയിൽ അധ്യക്ഷത വഹിക്കേണ്ടത് കൃഷി ഓഫിസറാണ്. എടത്വ: മൂന്ന്​ മാസമായി ആളില്ല. വിത്തും കുമ്മായവും വിതരണം ചെയ്യേണ്ട സമയം. വിത്ത് ലഭിക്കാൻ സബ്സിഡി ആനുകൂല്യങ്ങൾ കിട്ടാനും മാർഗമില്ല. കാവാലം: മാസങ്ങളായി ഒഴിവ്. കൃഷി അസിസ്​റ്റൻറും ഇല്ല. നെൽകൃഷി ഏറെയുള്ള പ്രദേശം. കർഷകർ പല ആവശ്യങ്ങൾക്കും ബുദ്ധിമുട്ടുന്നു. ചെറുതന: രണ്ട്​ ആഴ്ചയായി ഒഴിവ്. കൃഷിയിറക്കലിനു വിത്തിന് അപേക്ഷിക്കേണ്ട സമയമാണ്. ഡേറ്റ ബാങ്കിലുള്ള സ്ഥലങ്ങൾ പുനർനിർണയിക്കാനുള്ള അപേക്ഷകൾ തീർപ്പാക്കാൻ‌ തണ്ണീർത്തട സമിതി ചേരാനാകുന്നില്ല. പുളിങ്കുന്ന്: നാലു​ മാസമായി ആളില്ല. വീടുവെക്കാനായി ഭൂമി തരം മാറ്റുക തുടങ്ങിയ ആവശ്യങ്ങൾക്ക് പകരം ചുമതല നൽകിയ ഉദ്യോഗസ്ഥരെ അവർ ജോലി ചെയ്യുന്ന സ്ഥലത്തുപോയി കാണുകയാണ് നാട്ടുകാർ. കഞ്ഞിക്കുഴി: പ്രസവാവധിയിൽ പോയ ആൾക്കു പകരം നിയമനം നടന്നിട്ടില്ല. അധിക ചുമതല ചേർത്തല തെക്ക് വില്ലേജ് ഓഫിസർക്ക്. ഹെൽത്ത് ഓഫിസർ: ആലപ്പുഴ നഗരസഭയിൽ ഒന്നര പതിറ്റാണ്ടായി ആളില്ല. എം.ബി.ബി.എസ് ബിരുദധാരിയായിരിക്കണം ഹെൽത്ത് ഓഫിസർ. ഹെൽത്ത് ഇൻസ്പെക്ടർമാർക്കു ചുമതല നൽകുന്നത്​ തുടരുകയാണിവിടെ. നഗരസഭക്ക്​ മൂന്ന്​ ആരോഗ്യ ഉപകേന്ദ്രങ്ങളുണ്ട്. അവിടെ ഡോക്ടർ തസ്തികയില്ല. ദേശീയ നഗര ആരോഗ്യദൗത്യത്തിലൂടെ ഡോക്ടർമാരെ നിയോഗിക്കുകയാണ്. ഹോമിയോ ഡോക്ടർ: പെരുമ്പളം ഗ്രാമപഞ്ചായത്ത് ഹോമിയോ ആശുപത്രിയിൽ ഡോക്ടറില്ലാതായിട്ട്​ ഒരു മാസമായി. ഹെൽത്ത് ഇൻസ്പെക്ടർ: പത്തിയൂർ- പ്രാഥമിക ആരോഗ്യകേന്ദ്രത്തിൽ മൂന്ന്​ ജൂനിയർ ഹെൽത്ത് ഇൻസ്പെക്ടർമാരുടെ കുറവ്. നിയമനം നടത്തണമെന്ന് ആവശ്യപ്പെട്ട് ഡി.എം.ഒക്ക്​ പലതവണ കത്ത്​ നൽകിയെന്ന് പഞ്ചായത്ത് ഭരണ സമിതി. പലതവണ കോവിഡ് അതിവ്യാപന വിഭാഗത്തിലായ പഞ്ചായത്താണിത്. വയലാർ: സ്ഥലംമാറിപ്പോയ ആൾക്കു പകരം നിയമനമില്ല. ജൂനിയർ ഹെൽത്ത് ഇൻസ്പെക്ടർക്കു ചുമതല. പഞ്ചായത്ത് സെക്രട്ടറി: ഭരണിക്കാവിൽ ഒരു മാസമായി ആളില്ല. അസി. സെക്രട്ടറിക്കാണ് അധിക ചുമതല. ക്ഷീരവികസന ഓഫിസർ: ചമ്പക്കുളത്ത്​ ഉണ്ടായിരുന്ന ഓഫിസർ സ്ഥാനക്കയറ്റം ലഭിച്ചു തിരുവനന്തപുരത്തേക്കു പോയി. 14 ക്ഷീര സംഘങ്ങളുടെ ചുമതല വഹിക്കാൻ ആളില്ല. എലവേറ്റഡ് കാറ്റിൽ ഷെഡ് നിർമാണം പുരോഗമിക്കുകയാണ്. വെറ്ററിനറി ഡോക്ടർ: തകഴി -വിരമിച്ച ഡോക്ടർക്കു പകരം ആളെത്തിയില്ല. കുളമ്പുരോഗം ഉൾപ്പെടെ റിപ്പോർട്ട് ചെയ്യുന്ന സമയത്ത് പ്രതിരോധ കുത്തി​െവപ്പ്​​ ലഭിക്കാൻ പ്രയാസം. ദിവസവും ഒട്ടേറെ കർഷകർ എത്തുന്നു. ചെങ്ങന്നൂർ: മൊബൈൽ വെറ്ററിനറി ഹോസ്പിറ്റലിൽ സീനിയർ വെറ്ററിനറി സർജന്‍ ഇല്ല. പഞ്ചായത്ത് പ്രോജക്ടുകൾക്ക് അംഗീകാരം നൽകൽ, താലൂക്കിലെ മറ്റു മൃഗാശുപത്രികളിലേക്ക്​ വാക്സീൻ വിതരണം, ക്യാമ്പുകൾ സംഘടിപ്പിക്കൽ തുടങ്ങിയ ജോലികൾ സർജ​ൻെറ ചുമതലയാണ്. പകരം പോളിക്ലിനിക്കിലെ സീനിയർ സർജനു ചുമതല നൽ‍കിയിരിക്കുന്നു. കൃഷ്ണപുരം: ആഴ്ചകളായി ഡോക്ടറില്ല. കുളമ്പുരോഗ ഭീഷണി കാരണം കർഷകർ ആശങ്കയിലാണ്. എൽ.ആർ തഹസിൽദാർ: കുട്ടനാട്ടിൽ ഈ ചുമതലകൂടി തഹസിൽദാർ വഹിക്കുന്നു. നാല്​ ​െഡപ്യൂട്ടി തഹസിൽദാർമാരുടെയും ഒഴിവുണ്ട്. മറ്റുള്ളവർക്ക് ഈ ചുമതല കൂടി നൽകിയിരിക്കുകയാണിപ്പോൾ. ജില്ല പഞ്ചായത്ത് എൻജിനീയർ: ജില്ല പഞ്ചായത്തി​ൻെറ നിർമാണ പ്രവർത്തനങ്ങൾക്ക് മേൽനോട്ടം വഹിക്കേണ്ട തദ്ദേശ സ്വയംഭരണ വിഭാഗം പൊതുമരാമത്ത് എക്സി. എൻജിനീയർ തസ്തിക ഒഴിഞ്ഞുകിടക്കുന്നു. മേയ് 31നു വിരമിച്ചയാൾക്കു പകരം നിയമനമായില്ല. അസി. എക്സി. എൻജിനീയർക്കാണ് അധിക ചുമതല. എം.എൽ.എ ഫണ്ടിലെ നിർമാണങ്ങളുടെ മേൽനോട്ടവും എക്സി. എൻജിനീയർക്കാണ്.