റിയാദ്​ ഇന്ത്യൻ എംബസിയിൽ റിപ്പബ്ലിക്​ ദിനം ആഘോഷിച്ചു

റിയാദ്​: ഇന്ത്യയുടെ റിപ്പബ്ലിക് ദിനാഘോഷം പ്രവാസി ഇന്ത്യൻ സമൂഹത്തെ സാക്ഷിയാക്കി വിപുലമായ പരിപാടികളോടെ റിയാദിലെ ഇന്ത്യൻ എംബസിയിൽ നടത്തി. ഇന്ത്യയുടെ തനിമയും പരമ്പരാഗത രീതികളെയും അടയാളപ്പെടുത്തുന്ന ആഘോഷങ്ങൾക്ക് ഇന്ത്യൻ അംബാസഡർ ഡോ. സുഹൈൽ അജാസ് ഖാൻ നേതൃത്വം നൽകി. ഇന്ന് രാവിലെ എട്ടിന്​ എംബസി അങ്കണത്തിൽ പതാക ഉയർത്തൽ ചടങ്ങോടെയാണ് ആഘോഷ പരിപാടികൾക്ക് തുടക്കം കുറിച്ചത്. തുടർന്ന്, മഹാത്മാ ഗാന്ധിയുടെ പ്രതിമക്ക് പുഷ്പാർച്ചന നടത്തി ദേശീയ പിതാവിനോടുള്ള ആദരവ് പ്രകടിപ്പിച്ചു.

ചടങ്ങിൽ രാഷ്​ട്രപതി ദ്രൗപദി മുർമുവിന്‍റെ റിപ്പബ്ലിക് ദിന സന്ദേശം അംബാസഡർ വായിച്ചുകേൾപ്പിച്ചു. ‘സുവർണ ഇന്ത്യ - പൈതൃകവും വികസനവും’ എന്നതിൽ ഊന്നിയുള്ള രാഷ്​ട്രപതിയുടെ റിപ്പബ്ലിക്ക് ദിന സന്ദേശം ഇന്ത്യയുടെ നവീനതയും പുരോഗതിയും ഉൾക്കൊള്ളുന്നതായി.

2047ഓട്​ കൂടി ഇന്ത്യ വികസിത രാജ്യമാകാനുള്ള കുതിപ്പിലാണെന്ന സന്ദേശം കരഘോഷത്തോടെയാണ് സദസ്സ് ഏറ്റെടുത്തത്. റിയാദിലെ ഇൻറർനാഷനൽ ഇന്ത്യൻ സ്കൂളിലെയും ഇൻറർനാഷനൽ ഇന്ത്യൻ പബ്ലിക് സ്കൂളിലെയും വിദ്യാർഥികൾ, ‘വന്ദേ മാതരം’ ഉൾപ്പെടെയുള്ള ദേശഭക്തി ഗാനങ്ങൾക്ക്​ ചുവടുവെച്ച്​ നൃത്ത പരിപാടി അവതരിപ്പിച്ചു.

ഇന്ത്യൻ സമൂഹം ഉൾപ്പെടെ വിവിധ പ്രദേശങ്ങളിൽനിന്നുള്ള നിരവധി പ്രവാസികൾ ചടങ്ങിൽ പങ്കെടുത്തു. ഇന്ത്യയുടെ വികസനത്തി​െൻറ പുതിയ അധ്യായങ്ങൾ അടയാളപ്പെടുത്തിയ റിപ്പബ്ലിക്ക് ദിനാഘോഷ പരിപാടികൾ പ്രവാസി സമൂഹത്തിന്​ ഒത്തുകൂടാനും സ്നേഹവും ഐക്യവും പങ്കിടാനുമുള്ള അവസരമായി മാറി.