അഞ്ച് പ്രവർത്തകർ അറസ്റ്റിൽ കൊല്ലങ്കോട് (പാലക്കാട്): നെന്മാറ ചേരിൻകാട്ടിൽ ഉരുൾപൊട്ടിയ പ്രദേശത്തുകാർക്ക് ദുരിതാശ്വാസ തുക നൽകിയില്ലെന്നാരോപിച്ച് കെ. ബാബു എം.എൽ.എയുടെ ഓഫിസിലേക്ക് നടത്തിയ മാർച്ചിൽ പങ്കെടുത്ത എസ്.ഡി.പി.ഐ പ്രവർത്തകരുടെ ഒാേട്ടായിൽനിന്ന് വാളുകൾ കണ്ടെടുത്തു. സംഭവത്തിൽ അഞ്ച് എസ്.ഡി.പി.ഐ പ്രവർത്തകരെ അറസ്റ്റ് ചെയ്തു. മുതലമട അടവുമരം സ്വദേശി എം. ഷംസുദ്ദീൻ (23), പള്ളം സ്വദേശി അബ്ബാസ് (24), ചുള്ളിയാർമേട് സി. ഹാരിസ് (24), കാമ്പ്രത്ത് ചള്ള സ്വദേശികളായ തൗഫീഖ് (21), ആർ. നാസർ (26) എന്നിവരെയാണ് കൊല്ലങ്കോട് പൊലീസ് പിടികൂടിയത്. മാർച്ചിനുശേഷം എസ്.ഡി.പി.ഐ പ്രവർത്തകർ തിരിച്ച് ഓട്ടോയിൽ കാമ്പ്രത്ത് ചള്ളയിലേക്ക് പോകുന്നതിനിടെ സി.ഐ ബെന്നിക്ക് ലഭിച്ച രഹസ്യവിവരത്തെ തുടർന്നായിരുന്നു റെയ്ഡ്. പോത്തമ്പാടം വെയർഹൗസിനടുത്ത് ഓട്ടോ തടഞ്ഞുനിർത്തി പരിശോധിച്ചപ്പോൾ കൊടികൾക്കിടയിൽ സൂക്ഷിച്ച വാളുകൾ കണ്ടെടുക്കുകയായിരുന്നു. 35 സെൻറി മീറ്റർ നീളം വരുന്ന വാളുകളാണ് കിട്ടിയതെന്ന് എസ്.ഐ രാജേഷ് പറഞ്ഞു. കാമ്പ്രത്ത് ചള്ളയിലെ എസ്.ഡി.പി.ഐ ഓഫിസ്, അറസ്റ്റിലായവരുടെ വീടുകൾ എന്നിവിടങ്ങളിൽ പൊലീസ് പരിശോധന നടത്തി. പിടിയിലയാവരെ വെള്ളിയാഴ്ച കോടതിയിൽ ഹാജരാക്കും.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.