കൈറ്റ്​ 'സ്കൂൾ വിക്കി': മണ്ണംപേട്ട മാത എച്ച്.എസ്​ ജേതാക്കൾ

തൃശൂർ: പൊതുവിദ്യാഭ്യാസ വകുപ്പിൽ സ്കൂളുകളെക്കുറിച്ചുള്ള ഓൺലൈൻ പോർട്ടലായ സ്കൂൾ വിക്കിയിൽ മികച്ച താളുകൾക്ക്​ ഏർപ്പെടുത്തിയ ജില്ലതല പുരസ്കാരം മണ്ണംപേട്ട മാത എച്ച്.എസ്​ കരസ്ഥമാക്കി​. കെ.കെ.ടി.എം.ജി.ജി.എച്ച്.എസ്.എസ് കൊടുങ്ങല്ലൂർ, എസ്.എസ്.ജി.എച്ച്.എസ്.എസ് പുറനാട്ടുകര എന്നിവ രണ്ടും മൂന്നും സ്ഥാനങ്ങൾക്ക്​ അർഹരായി. 15,000 സ്കൂളുകളെ കോർത്തിണക്കി വിദ്യാഭ്യാസ മേഖലയിൽ രാജ്യത്തെ പ്രാദേശിക ഭാഷയിലെ ഏറ്റവും വലിയ ഡിജിറ്റൽ വിവരശേഖരമായ 'സ്കൂൾ വിക്കി' സജ്ജമാക്കിയ കേരള ഇൻഫ്രാസ്ട്രക്ചർ ആൻഡ്​ ടെക്നോളജി ഫോർ എജുക്കേഷൻ (കൈറ്റ്) ആണ് പുരസ്കാരം ഏർപ്പെടുത്തിയത്. സമ്മാനാർഹരായ സ്കൂളുകൾക്ക്​ യഥാക്രമം 25,000, 15,000, 10,000 രൂപ വീതം കാഷ് അവാർഡ്​ ലഭിക്കും. ഒപ്പം ട്രോഫിയും പ്രശംസപത്രവും കൂടി ലഭിക്കും. ഇൻഫോ ബോക്സിന്‍റെ കൃത്യത, ചിത്രങ്ങൾ, തനത് പ്രവർത്തനം, ക്ലബുകൾ, വഴികാട്ടി, സ്കൂൾ മാപ്പ് തുടങ്ങിയ 20 മാനദണ്ഡങ്ങൾ അടിസ്ഥാനമാക്കിയാണ് കൈറ്റ് സി.ഇ.ഒ കെ. അൻവർ സാദത്ത് ചെയർമാനായ സമിതി സംസ്ഥാനതലത്തിൽ അവാർഡുകൾ നിശ്ചയിച്ചത്. ജില്ലതലത്തിൽ ശ്രദ്ധേയമായ താളുകൾ ഒരുക്കിയ 30 വിദ്യാലയങ്ങൾക്ക്​ കൈറ്റ് പ്രശംസപത്രം നൽകും. ജൂലൈ ഒന്നിന് തിരുവനന്തപുരത്ത് നടക്കുന്ന ചടങ്ങിൽ വിദ്യാഭ്യാസ മന്ത്രി വി. ശിവൻകുട്ടി അവാർഡുകൾ സമ്മാനിക്കും. സ്കൂളുകളുടെ പട്ടിക www.schoolwiki.in വെബ്സൈറ്റിൽ ലഭ്യമാണ്. ജില്ല തലത്തിൽ ഒന്നും രണ്ടും മൂന്നും അവാർഡ്​ ലഭിച്ച സ്കൂളുകളുടെ ലിങ്കുകൾ: www.schoolwiki.in/22071, www.schoolwiki.in/23013, www.schoolwiki.in/22076.