91ലും നോമ്പ് അനുഷ്​ഠിച്ച്​ ഫാത്തിമുത്ത്

പന്തളം: 79 വർഷമായി മുടങ്ങാതെ നോമ്പനുഷ്ഠിക്കുകയാണ് ഫാത്തിമുത്ത് ബീവി. 91ാം വയസ്സിലും പൂർണ ആരോഗ്യവതിയായി ഇപ്പോഴും നോമ്പ് പിന്തുടരുന്നു. പന്തളം പൂഴിക്കാട് തുണ്ടത്തുവിള പുത്തൻവീട്ടിൽ ഫാത്തിമുത്ത് ബീവി, നാല്​ തലമുറയായി 17 കൊച്ചുമക്കളുമടങ്ങുന്ന കുടുംബത്തിലെ തലമുതിർന്ന അംഗമാണ്​. പത്തനംതിട്ട വലഞ്ചുഴി കോയിപ്പുറത്ത്​ പരേതരായ ഹസൻ മുഹമ്മദ് റാവുത്തറുടെയും മുഹമ്മദ്‌ അമ്മയുടെയും അഞ്ചുമക്കളിൽ മൂന്നാമത്തേതാണ്. പന്ത്രണ്ടാമത്തെ വയസ്സിലാണ് മുപ്പത്​ നോമ്പും ആദ്യമായി പിടിക്കുന്നത്. പിന്നീട് ഇതുവരെയും മുടക്കിയിട്ടില്ല. ആദ്യകാലങ്ങളിലെ നോമ്പ്​ അനുഭവങ്ങൾ അവർ 'മാധ്യമ'വുമായി പങ്കുവെച്ചു. ഇക്കാലത്തെ​പ്പോലെ ഭക്ഷണങ്ങൾ കൂടുതലായി അന്ന്​ ഉണ്ടായിരുന്നില്ല. ഉള്ളത് വിശപ്പടക്കാൻ മാത്രം. ആദ്യകാലങ്ങളിൽ നോമ്പ് തുറക്കാനും ഇട അത്താഴത്തിനും ആയി ചെണ്ട കൊട്ടിയായിരുന്നു അറിയിപ്പുകൾ ലഭിച്ചിരുന്നത്. ഇപ്പോൾ സമയം എളുപ്പം പോകുന്നതുപോലെ തോന്നുന്നു. ഇപ്പോഴും ആരോഗ്യപരമായി കാര്യമായ ബുദ്ധിമുട്ടുകൾ ഇല്ല. നല്ല ഓർമശക്തി ഉണ്ട്. സുപ്രീംകോടതി മുൻ ജഡ്​ജി ഫാത്തിമ ബീവിയുമായി മദ്​റസ പഠനത്തിൽ ഒരുമിച്ചായിരുന്നു. 1947ൽ തുണ്ടത്തുവിളയിൽ പരേതനായ വിദ്യാഭ്യാസ വകുപ്പ് ഉദ്യോഗസ്ഥൻ ടി.എസ്. ഹുസൈൻ റാവുത്തരെ വിവാഹം കഴിച്ചാണ് പന്തളത്ത് എത്തുന്നത്​. കുട്ടിക്കാലത്ത് സർ സി.പി. രാമസ്വാമിയെ കാണാൻ പത്തനംതിട്ടയിൽ എത്തിയിരുന്നതായും ഫാത്തിമുത്ത് ബീവി പറഞ്ഞു. മകൻ അബ്ദുൽ ഹക്കീം റാവുത്തർക്ക്​ ഒപ്പമാണ് ഇപ്പോൾ താമസം. ------ ഫോട്ടോ: ഫാത്തിമുത്ത് ബീവി