കല്ലാർ നദിയിലെ തടയണ പുനഃസ്ഥാപിക്കൽ നീളുന്നു

വടശ്ശേരിക്കര: കല്ലാർനദിയിൽ വടശ്ശേരിക്കര സ്നാനഘട്ടത്തിലെ തകർന്ന തടയണ പുനഃസ്ഥാപിക്കൽ നീളുന്നു. ഇതുമൂലം മുങ്ങിക്കുളിക്കാൻപോലും വെള്ളമില്ലാതെ മാസപൂജക്ക്​ എത്തിയ ശബരിമല തീർഥാടകരും നാട്ടുകാരും വലഞ്ഞു. ശബരിമല തീർഥാടകരുടെ പ്രധാന ഇടത്താവളമായ വടശ്ശേരിക്കരയിലെ കല്ലാർ നദിയിൽ പാലത്തിനുസമീപമാണ് തടയണ ഉണ്ടായിരുന്നത്​. 2018ലെ മഹാപ്രളയത്തിൽ പൂർണമായും തകരുകയായിരുന്നു. പ്രധാനമായും തീർഥാടകർക്ക് വേനൽക്കാലത്ത് കുളിക്കാൻ വെള്ളം ലഭ്യമാക്കുക എന്ന ലക്ഷ്യത്തോടെയാണ്​ നിർമിച്ചത്. വേനൽ തുടങ്ങുമ്പോൾതന്നെ നീരൊഴുക്ക് നിലക്കാറുള്ള കല്ലാറ്റിൽ ഇത്തരത്തിൽ വെള്ളം കെട്ടിനിർത്തുന്നത് നാട്ടുകാർക്കും സഹായകരമായിരുന്നു. ജലവകുപ്പ് നിർമിച്ച തടയണ പുനർനിർമിക്കാൻ കരാർ നൽകിയിരുന്നെങ്കിലും നദിയിൽ കരിങ്കല്ല് നിരത്തുന്ന പണി മാത്രമേ ഇതുവരെ നടന്നുള്ളൂ. ഈ വേനൽക്കാലത്തെങ്കിലും തടയണ നിർമാണം പൂർത്തീകരിക്കണമെന്നാണ് നാട്ടുകാരുടെ ആവശ്യം. കല്ലാർനദിയിലെ തകർന്ന തടയണ