അട്ടപ്പാടിയിൽ പുലി ആക്രമണം; രണ്ട് ആടുകൾ ചത്തു

അഗളി: അട്ടപ്പാടിയിൽ പുലിയുടെ ആക്രമണത്തിൽ രണ്ട് ആടുകൾ ചത്തു. നരസിമുക്ക് പൂവാതാൾ കോളനിയിലെ കൃഷ്ണമൂർത്തിയുടെ (തമ്പി) ആടുകളെയാണ് പുലി പിടിച്ചത്. ഞായറാഴ്ച പുലർച്ച ഒരു മണിയോടുകൂടി കൂട്ടിൽ കെട്ടിയിട്ടിരുന്ന ആടുകളെയാണ് പുലി വകവരുത്തിയത്. ആടുകളിൽ ഒന്നിനെ പുലി വനത്തിനുള്ളിലേക്ക് വലിച്ചിഴച്ച് കൊണ്ടുപോയി.

അട്ടപ്പാടിയിൽ വന്യമൃഗങ്ങളുടെ ആക്രമണത്തിനിരയാകുന്ന വളർത്തുമൃഗങ്ങളുടെ എണ്ണം നാൾക്കുനാൾ വർധിച്ചു വരുകയാണ്. കഴിഞ്ഞ ദിവസം പെട്ടിക്കല്ലിൽ കർഷകന്റെ ആറ് ആടുകളെ കാട്ടുനായ്ക്കൾ ആക്രമിച്ചു കൊലപ്പെടുത്തിയിരുന്നു.