പാതയോരങ്ങളിൽ ചൂരൽ ഉൽപന്നങ്ങളുമായി ആന്ധ്ര സംഘമെത്തി

കോട്ടായി: മഴക്ക് ശമനം വന്നാൽ പാതയോരങ്ങളിൽ ചൂരൽ ഉൽപന്നങ്ങളുമായി സ്ഥാനം പിടിക്കാറുള്ള ആന്ധ്ര സ്വദേശികൾ പതിവുപോലെ ഇത്തവണയും എത്തി. കോട്ടായി-കുഴൽമന്ദം പാതയോരത്ത് നിർമാണത്തിലും രൂപത്തിലും വൈവിധ്യം നിറഞ്ഞ കലാസൃഷ്​ടികൾ യാത്രക്കാരെയും പ്രദേശവാസികളെയും ഒരുപോലെ ആകർഷിക്കുന്നു​. പതിവായി ഉത്​പന്നങ്ങളുമായി എത്തുന്ന ആന്ധ്ര സ്വദേശികളായ എട്ട് കുടുംബങ്ങളാണ്​ ഇക്കുറി പതിമൂന്ന് മൂച്ചിയിൽ എത്തിയത്​. ഇവർ വരുമ്പോൾ നാട്ടിൽ സുലഭമായി ലഭിക്കുന്ന ചൂരലും ലോഡ് കണക്കിന് എത്തിക്കും. തുടർന്ന്​ ചൂരൽ കൊണ്ട് വിവിധ കാർഷിക ഉപകരണങ്ങളും അലങ്കാര വസ്തുക്കളും നിർമിച്ച് വിൽപന നടത്തും. ഇനി മഴക്കാലം ആരംഭിക്കുന്നതോടെയാണ്​ സംഘം മടങ്ങുക. അതുവരെ താമസവും ഭക്ഷണവും ഉറക്കവുമെല്ലാം പാതയോരത്താണ്​. തൊഴിലിടവും വിപണന കേന്ദ്രവും പാതയോരമാണ്. ചൂരൽ ഉൽപന്നങ്ങൾ മിതമായ വിലക്കാണ് വിൽപന നടത്തുന്നത്​. സാമാന്യം നല്ല രീതിയിൽ വിൽപന നടക്കുന്നുണ്ടെന്ന്​ സംഘത്തലവൻ വാസവ പറഞ്ഞു. PE- PRY - 2 മാത്തൂർ പതിമൂന്ന് മൂച്ചി പ്രദേശത്ത് ചൂരൽ ഉൽപന്നങ്ങൾ വിൽക്കുന്ന ആന്ധ്ര സംഘം