കുഞ്ഞുങ്ങളുടെ മരണസാധ്യത: അരിവാൾ രോഗബാധിതർ ഗർഭധാരണം ഒഴിവാക്കണമെന്ന് ആരോഗ്യവകുപ്പ്

അഗളി: സിക്കിൾസെൽ അനീമിയ (അരിവാൾ രോഗം) ബാധിതർ ഗർഭധാരണം ഒഴിവാക്കണമെന്ന് ആരോഗ്യ വകുപ്പ്. ഇത്തരം രോഗികളായ ദമ്പതികൾക്കുണ്ടാകുന്ന കുഞ്ഞുങ്ങൾ പ്രസവത്തോടെയോ ശേഷമോ മരിക്കാൻ സാധ്യത ഏറെയായതിനാലാണ് ഈ നിർദേശം മുന്നോട്ടുവെച്ചത്. എന്നാൽ, വകുപ്പി​ൻെറ ഈ നിർദേശം മുഖവിലക്കെടുക്കാൻ അട്ടപ്പാടിയിലെ ആദിവാസികൾ തയാറായിട്ടില്ല. മുപ്പത്തയ്യായിരത്തോളമാണ് അട്ടപ്പാടിയിലെ ആദിവാസി ജനസംഖ്യ. ഇതിൽ രണ്ടായിരത്തിലധികം പേർ പോഷകാഹാരക്കുറവിനാൽ ശാരീരിക അവശത അനുഭവിക്കുന്നവരാണ്. 200 അരിവാൾ രോഗബാധിതരുമുണ്ട്. കോളനികളിൽ ഒത്തുചേർന്ന് ജീവിക്കുന്ന ഇവരിൽ ബന്ധുക്കൾ തമ്മിലുള്ള വിവാഹമാണ് ഏറെയും നടക്കാറുള്ളത്​. നൂറ്റാണ്ടുകളായി നടക്കുന്ന ഈ സമ്പ്രദായം മാറ്റാൻ ആദിവാസികൾ തയാറല്ലെന്നതാണ് ആരോഗ്യവകുപ്പിന് മുന്നിലുള്ള വെല്ലുവിളി. ഊരുകളിൽ വ്യാജമദ്യവും അനധികൃത മദ്യവും സുലഭമാണ്. അമിത മദ്യപാനം പുരുഷൻമാരുടെ ആരോഗ്യസ്ഥിതിയെ സാരമായി ബാധിക്കുന്നു. ഇത് ഗർഭസ്ഥ ശിശുവി​ൻെറ ആരോഗ്യത്തെയും ബാധിക്കുന്നെന്ന് ചൂണ്ടിക്കാണിക്കപ്പെടുന്നു. അമിത മദ്യപാനം മൂലമുള്ള സംഘർഷങ്ങളും ആദിവാസി കുടുംബങ്ങളിൽ വ്യാപകമാണ്. ഇത് ഗർഭിണികളായ അമ്മമാരുടെ മാനസിക ആരോഗ്യത്തെയും കാര്യമായി ബാധിക്കുന്നു. ഊരുകളിൽ നിന്ന്​ മദ്യം ഒഴിവാക്കാനുള്ള എക്സൈസ് വകുപ്പി​ൻെറ പ്രവർത്തനങ്ങൾ ഫലം കാണുന്നില്ലെന്ന് ആക്ഷേപമുണ്ട്. കോടികൾ ചെലവഴിച്ച്​ നടത്തിയ മില്ലറ്റ് ഗ്രാമം, സാമൂഹിക അടുക്കള പദ്ധതികൾ ഭൂരിഭാഗം ആദിവാസികൾക്കും ഗുണം ചെയ്തി​െല്ലന്ന് പട്ടികവർഗ ക്ഷേമ മന്ത്രി കെ. രാധാകൃഷ്ണൻ തന്നെ വ്യക്തമാക്കിയിരുന്നു.