ആലപ്പുഴയിൽ നടന്ന കേരള സ്റ്റേറ്റ് ക്ലാസിക് ബെഞ്ച് പ്രസ്സ് മത്സരത്തിൽ ഒന്നാം സ്ഥാനം ലഭിച്ച സോളമൻ തോമസ് ട്രോഫിയുമായി. പരിശീലകൻ ബിജിൻ സാങ്കി സമീപം
കോട്ടയം: കേരള സ്റ്റേറ്റ് പവർലിഫിറ്റിങ്ങ് അസോസിയേഷന്റെയും ആലപ്പുഴ ജില്ല പവർലിഫിറ്റിങ്ങ് അസോസിയേഷന്റെയും സംയുക്താഭിമുഖ്യത്തിൽ നടത്തിയ കേരള സ്റ്റേറ്റ് ക്ലാസിക് ബെഞ്ച് പ്രസ്സ് മത്സരത്തിൽ മാസ്റ്റേഴ്സ് 293 കിലോ വിഭാഗത്തിൽ കോട്ടയം ജില്ലക്കായി മത്സരിച്ച സോളമൻ തോമസ് ഒന്നാം സ്ഥാനം നേടി സ്വർണ മെഡൽ കരസ്ഥമാക്കി.
കഴിഞ്ഞ ജൂലൈ 30ന് ഫോർട്ട് കൊച്ചിയിൽ നടന്ന കേരള സ്റ്റേറ്റ് ക്ലാസിക് പവർലിഫ്റ്റിങ് ചാമ്പ്യൻഷിപ്പിൽ വെള്ളി നേടിയിരുന്നു. കൂടാതെ ഒക്ടോബറിൽ കോട്ടയം ജില്ല പഞ്ചഗുസ്തി ചാമ്പ്യൻഷിപ്പിൽ ഗ്രാന്റ് മാസ്റ്റർ 100 കിലോ വിഭാഗത്തിൽ സ്വർണവും നേടിയിരുന്നു. പവർലിഫ്റ്റിങ് ഇന്ത്യൻ ചാമ്പ്യനും പലതവണ സ്ട്രോങ്മാൻ പട്ടവും ലഭിച്ചിട്ടുള്ള തിരുവനന്തപുരത്തിന്റെ ബിജിൻ സാങ്കി ആണ് പവർലിഫ്റ്റിങ് പരിശീലകൻ.
തിരുവനന്തപുരത്ത് ജോലി ചെയ്യവെ ജില്ലാതല ബോഡി ബിൽഡിങ് മത്സരത്തിൽ മാസ്റ്റേഴ്സ് വിഭാഗത്തിൽ രണ്ടു തവണ സ്വർണം നേടിയിട്ടുള്ള സോളമൻ തോമസ് സ്കൂൾ - കോളേജ് പഠന കാലത്ത് സംസ്ഥാനതല ഗുസ്തി മത്സരത്തിൽ നാലു തവണ ഒന്നാം സ്ഥാനത്തോടെ സ്വർണ മെഡൽ കരസ്ഥമാക്കിയിട്ടുണ്ട്.
കളത്തിപ്പടി കണ്ണംപള്ളിയിൽ പരേതനായ കെ.സി. തോമസിന്റെയും ശോശാമ്മയുടെയും മകനാണ്. അമയന്നൂർ പാറയിൽ പി.ടി. ഏബ്രഹാമിന്റെയും അന്നമ്മയുടെയും മകൾ ക്രിസ്റ്റി ആണ് ഭാര്യ. ബി.സി.എം കോളേജ് രണ്ടാം വർഷ വിദ്യാർത്ഥിനി സൂസനും, ഗിരിദീപം സെൻട്രൽ സ്കൂൾ പ്ളസ് വൺ വിദ്യാർത്ഥി ഗബ്രിയേലും മക്കളാണ്.
ജനുവരി 15 മുതൽ ഔറംഗാബാദിൽ നടക്കുന്ന ദേശീയ ബെഞ്ച് പ്രസ്സ് ചാമ്പ്യൻഷിപ്പിൽ സോളമൻ തോമസ് കേരളത്തെ പ്രതിനിധീകരിക്കും.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.