ദേശീയപാതയിലെ ഓടമൂടി പാരലല്‍ കോളജ് റോഡ് നിര്‍മിച്ചു

മുണ്ടക്കയം ഈസ്റ്റ്: ദേശീയപാതയിലെ ഓടകള്‍ മൂടി പാരലല്‍ കോളജ് റോഡ് നിര്‍മിച്ചത് അപകടഭീഷണി ഉയര്‍ത്തുന്നു. കൊട്ടാരക്കര -ദിണ്ഡുകല്‍ ദേശീയപാതയില്‍ കൊടികുത്തിക്കും പെരുവന്താനത്തിനുമിടയിലെ പാരലല്‍ കോളജാണ് ഓട മണ്ണും കല്ലും സിമന്‍റും ചേര്‍ത്ത്​ റോഡാക്കി മാറ്റിയത്. ഇതോടെ കുത്തിറക്കത്തില്‍ ഓടയിലൂടെ വരുന്ന വെള്ളം ദേശീയ പാതയിലേക്ക് ഒഴുകുകയാണ്. ദേശീയപാത അധികൃതര്‍ നിര്‍മിച്ച കോണ്‍ക്രീറ്റ് ഓടയാണ് ഇവര്‍ അനധികൃതമായി മൂടിയത്. കോളജിന്‍റെ വക സ്ഥലത്തുനിന്ന്​ ഒഴുകുന്ന ഉറവയും റോഡിലേക്കാണ് പതിക്കുന്നത്. പെരുവന്താനം ടൗണില്‍നിന്നുള്ള പെയ്ത്തുവെള്ളവും നിരവധി പുരയിടങ്ങളിലെ ഉറവയും ഒഴുകുന്നത് ഈ ഓടയിലൂടെയാണ്. ഇതെല്ലാം കോളജ്​ ഭാഗത്ത് എത്തുമ്പോള്‍ റോഡിലേക്കാണ്​ വരുന്നത്​. സമീപത്ത് ദേശീയപാത നിര്‍മിച്ച കലുങ്ക് നിലവിലുണ്ടങ്കിലും ഇവിടേക്ക് വെള്ളം എത്തുന്നില്ല. വെള്ളം ഒഴുകുന്നതുമൂലം റോഡിന്‍റെ മറുകരയിലെ സംരക്ഷണ ഭിത്തി അപകടാവസ്ഥയിലാണ്. ഇവിടെ 50മീറ്റര്‍ വ്യത്യാസത്തില്‍ മൂന്നിടത്താണ് സംരക്ഷണ ഭിത്തി തകര്‍ന്നത്. ഒരുഭാഗത്ത്​ വന്‍ കൊക്കയാണ്. അപകടാവസ്ഥ സൃഷ്ടിക്കുന്ന പ്രദേശത്താണ് ഓട മൂടി റോഡുണ്ടാക്കിയത്. സംഭവം ശ്രദ്ധയില്‍പെട്ടിട്ടുണ്ടെന്നും റോഡ് പൊളിച്ചുനീക്കാന്‍ കോളജ് അധികൃതര്‍ക്ക് നോട്ടീസ് നല്‍കുമെന്നും ദേശീയപാത അധികൃതര്‍ അറിയിച്ചു. KTG WBL DESEEYAPAATHA OADA.... ഫോട്ടോ.. ദേശീയപാതയോരത്ത് ഓടമൂടി നിര്‍മിച്ച റോഡ്