ചാലുകുന്ന് ഭാഗത്ത് വൺവേ സൂചന ബോർഡ്​ സ്ഥാപിക്കണം

കോട്ടയം: കോട്ടയം-മെഡിക്കൽ കോളജ് റോഡിൽ ചാലുകുന്ന് ഭാഗത്ത് വൺവേ സൂചന ബോർഡ്​ സ്ഥാപിക്കണമെന്ന ആവശ്യം ശക്തം. വൺവേ ബോർഡിന്‍റെ അഭാവം വഴിയാത്രക്കാർക്ക് ബുദ്ധിമുട്ടുണ്ടാക്കുന്ന സാഹചര്യത്തിലാണ്​ ആവശ്യമുയരുന്നത്​. മെഡിക്കൽ കോളജ് ഭാഗത്തുനിന്ന്​ വരുന്നവർക്ക് ചുങ്കത്തെ രണ്ടാമത്തെ ഹംപിനുശേഷം ചാലുകുന്നിലേക്കുള്ള വൺവേ കയറ്റം ആരംഭിക്കുന്നിടത്താണ് വഴിപിഴക്കുന്നത്. മിക്കവരും വൺവേതെറ്റി വലത്തേക്കുള്ള റോഡിലേക്ക്​ കയറും. വൺവേയാണെന്ന് അറിയാതെ നല്ല വേഗത്തിലാണ് വാഹനങ്ങൾ ചുങ്കം ഭാഗത്തുനിന്ന്​ കയറിവരുന്നത്. ഇതറിയാതെ വൺവേയിലൂടെ പോകുന്നവരാണ് അപകടത്തിൽപെടുന്നത്. അന്യജില്ലക്കാർക്കും നാഷനൽ പെർമിറ്റ് ലോറിക്കാർക്കും ഈ ഭാഗമെത്തുമ്പോൾ അബദ്ധം പിണയുന്നത്​ പതിവാണ്​. കോട്ടയത്തിന് ഇത് വഴിയാണോ പോകേണ്ടതെന്ന് ചോദിക്കുമ്പോൾ സമീപകടകളിലും വഴിയാത്രക്കാരും യഥാർഥ വഴികാട്ടി തിരിച്ചുവിടാറാണ് പതിവ്. ചാലുകുന്ന് റോഡിന്‍റെ ആരംഭത്തിൽ വലത്തോട്ട് തിരിഞ്ഞ് പോകുന്നിടത്ത് വൺവേ സൂചന ബോർഡുണ്ട്. അത്തരത്തിൽ കോട്ടയത്തേക്കുള്ള വൺവേ ആരംഭിക്കുന്നിടത്തും വെക്കണമെന്നാണ് പ്രദേശവാസികളുടെയും വഴിയാത്രക്കാരുടെയും ആവശ്യം.