മഴ കുറയുന്നു; ഇടുക്കി അണക്കെട്ടിൽ ബ്ലൂ അലർട്ട്​

ഇടുക്കിയിൽ 69.38 ശതമാനം വെള്ളം തൊടുപുഴ: മുൻദിവസങ്ങളെ അപേക്ഷിച്ച്​ ഇടുക്കി ജില്ലയിൽ മഴക്ക്​ നേരിയ ശമനം. ഇതോടെ റെഡ്​ അലർട്ട്​ പിൻവലിച്ചു. എന്നാൽ, ജലനിരപ്പ്​ ഉയർന്നതിനെത്തുടർന്ന്​ ഇടുക്കി അണക്കെട്ടിൽ ബ്ലൂ അലർട്ട്​ പ്രഖ്യാപിച്ചു. ജലനിരപ്പ്​ ഉയർന്ന വൈഗ അണക്കെട്ട്​ വ്യാഴാഴ്ച തുറക്കും. ജലനിരപ്പ്​ 2375.53 അടിയിലെത്തിയതിനെത്തുടർന്നാണ്​​ ഇടുക്കിയിൽ ബ്ലൂ അലർട്ട്​ പ്രഖ്യാപിച്ചത്​. സംഭരണശേഷിയുടെ 69.38 ശതമാനം വെള്ളമാണ്​ ഇപ്പോൾ അണക്കെട്ടിലുള്ളത്​. 2134.85 അടിയാണ്​ മുല്ലപ്പെരിയാറിലെ ജലനിരപ്പ്​. പൊന്മുടി, ലോവർ പെരിയാർ, കല്ലാർകുട്ടി, ഇരട്ടയാർ, കുണ്ടള അണക്കെട്ടുകൾ റെഡ്​ അലർട്ടിലാണ്​. സുരക്ഷാ മുൻകരുതലിന്‍റെ ഭാഗമായി ജില്ലയിലെ എല്ലാ വിനോദസഞ്ചാര കേന്ദ്രങ്ങളുടെയും പ്രവർത്തനം നിർത്തിവെക്കാൻ ജില്ല കലക്ടർ ഉത്തരവായി. ഏഴ്​ ക്യാമ്പുകളിലായി 51 കുടുംബങ്ങളിലെ 128 കുടുംബങ്ങളെ മാറ്റിപ്പാർപ്പിച്ചിട്ടുണ്ട്​. തൊടുപുഴ-തൊമ്മൻകുത്ത്​-വണ്ണപ്പുറം റോഡിലെ ചപ്പാത്ത്​ പൂർണമായും വെള്ളത്തിനടിയിലായതോടെ ബുധനാഴ്ച ഇതുവഴി ഗതാഗതം ഒമ്പത്​ മണിക്കൂറോളം മുടങ്ങി. കാളിയാർപുഴ കരകവിഞ്ഞ്​ കോടിക്കുളം പഞ്ചായത്തിലെ ഇല്ലിച്ചുവട്​ പ്രദേശത്തെ ഏതാനും വീടുകളിൽ വെള്ളം കയറി. കാന്തല്ലൂർ-പെരുമല റോഡിൽ 30 അടി ഉയരമുള്ള തിട്ടയിടിഞ്ഞ് റോഡിൽ പതിച്ചു.