ഡോ. ഹനാദി അൽ ഹമദിന് സബാഹ് പുരസ്​കാരം

ദോഹ: റുമൈല ആശുപത്രി, ഖത്തർ റീഹാബിലിറ്റേഷൻ ഇൻസ്​റ്റിറ്റ്യൂട്ട് മെഡിക്കൽ ഡയറക്ടർ ഡോ. ഹനാദി അൽ ഹമദിന് കുവൈത്ത് മുൻ ഭരണാധികാരി ശൈഖ് സബാഹ് അൽ അഹ്മദ് അൽ ജാബിർ അൽ സബാഹിന്‍റെ പേരിലുള്ള ഉന്നത പുരസ്​കാരം. വയോജനങ്ങളുടെ ആരോഗ്യ പരിരക്ഷയിലും ആരോഗ്യ ഉയർച്ചയിലുമുള്ള ഗവേഷണത്തിനാണ് ഖത്തർ പൊതുജനാരോഗ്യ മന്ത്രാലയം ഹെൽത്തി ഏജിങ്​ നാഷനൽ ലീഡ് കൂടിയായ ഡോ. ഹനാദി അൽ ഹമദിന് പുരസ്​കാരം ലഭിച്ചിരിക്കുന്നത്. ലോകാരോഗ്യ സംഘടനയുടെ 150ാമത് എക്സിക്യൂട്ടിവ് ബോർഡ് യോഗത്തിലാണ് പുരസ്​കാരം നൽകിയത്.

പ്രായമായവരുടെ ആരോഗ്യ പരിരക്ഷയും സംരക്ഷണവും ഉയർത്തിക്കൊണ്ടുവരുന്നതിൽ ഖത്തർ ആരോഗ്യമേഖലയുടെ ശ്രമങ്ങളുടെ ഫലമാണ് ഉന്നതമായ ശൈഖ് സബാഹ് അൽ അഹമ്മദ് അൽ ജാബിർ അൽ സബാഹ് പുരസ്​കാരമെന്നും ലോകാരോഗ്യ സംഘടനയുടെ ഏറ്റവും മൂല്യമേറിയ പുരസ്​കാരങ്ങളിലൊന്നാണ് ഇതെന്നും നേട്ടത്തിൽ അതിയായ സന്തോഷവും അഭിമാനവുമുണ്ടെന്നും പുരസ്​കാരം സ്വീകരിച്ച് ഡോ. ഹനാദി അൽ ഹമദ് പറഞ്ഞു.

രാജ്യത്തെ മുതിർന്ന പൗരന്മാർക്ക് ഏറ്റവും മികച്ച ചികിത്സ ലഭ്യമാക്കുന്നതിൽ ഖത്തർ പ്രതിജ്ഞാബദ്ധമാണ്. ഈ മേഖലയിൽ നിരവധി നേട്ടങ്ങൾ ഖത്തർ ആരോഗ്യമേഖല കൈവരിച്ചിരിക്കുന്നു. മൂന്ന് ഹെൽത്ത് സെൻററുകളിൽ മെമ്മറി ആൻഡ് ജെറിയാട്രിക്സ്​ വിഭാഗത്തിൽ സ്​പെഷലൈസ്​ഡ് ക്ലിനിക്കുകൾ ആരംഭിച്ചിട്ടുണ്ട്. എമർജൻസി വിഭാഗങ്ങളിൽ ജെറിയാട്രിക് കൺസൽട്ടൻസി സേവനങ്ങളും വക്റ ആശുപത്രിയിൽ ജെറിയാട്രിക് ക്ലിനിക്കും ആരോഗ്യ വകുപ്പ് ആരംഭിച്ചുകഴിഞ്ഞു -ഡോ. ഹനാദി അൽ ഹമദ് വിശദീകരിച്ചു.

കോവിഡ് കാലത്ത് പ്രായമായവരുടെ ആരോഗ്യപരിരക്ഷ മാത്രം കണക്കിലെടുത്ത് നിരവധി സേവനങ്ങളാണ് ആരംഭിച്ചത്​. ഡേ കെയർ യൂനിറ്റ്, അക്യൂട്ട് കെയർ യൂനിറ്റ്, മോണിറ്ററിങ്​ യൂനിറ്റ്, വെർച്വൽ ക്ലിനിക്കുകൾ, ഫിസിയോ തെറപ്പിക്ക് മാത്രമായുള്ള വെർച്വൽ സേവനങ്ങൾ, പ്രായമായവർക്കും പരിചാരകർക്കുമായി ദേശീയ ഹെൽപ്​ലൈൻ, മെഡിസിൻ ഡെലിവറി സേവനം തുടങ്ങിയവ ഇതിൽ പ്രധാനപ്പെട്ടതാണെന്നും അവർ കൂട്ടിച്ചേർത്തു.

വയോജനങ്ങളുടെ ആരോഗ്യ സംരക്ഷണം ഉറപ്പുവരുത്തുന്നതിലും ആരോഗ്യ ചികിത്സാരംഗത്തും മികച്ച പ്രകടനം കാഴ്ചവെക്കുന്നവർക്ക് രണ്ട് വർഷത്തിലൊരിക്കൽ നൽകുന്ന ലോകാരോഗ്യ സംഘടനയുടെ പുരസ്​കാരമാണ് ശൈഖ് സബാഹ് അൽ അഹ്മദ് അൽ ജാബിർ അൽ സബാഹ് പുരസ്​കാരം.