ഒമാൻ ഓട്ടോമൊബൈൽ അസോസിയേഷനിൽ ആധുനിക സൗകര്യങ്ങളോടെ നിർമിച്ച ഗ്രൗണ്ട്
മസ്കത്ത്: സോക്ക ലോകകപ്പ് സിക്സ് എ സൈഡ് ഫുട്ബാൾ ടൂർണമെന്റിന് മസ്കത്തിൽ വെള്ളിയാഴ്ച തുടക്കമാകും. മിഡിൽ ഈസ്റ്റിൽ ആദ്യമായി നടക്കുന്ന ഈ കളിമാമാങ്കത്തിൽ ലോകമെമ്പാടുമുള്ള 40 ടീമുകളാണ് മാറ്റുരക്കുന്നത്.
ഒമാൻ ഓട്ടോമൊബൈൽ അസോസിയേഷനിലെ സ്പോർട്സ് മേക്കേഴ്സ് സ്റ്റേഡിയത്തിൽ നടക്കുന്ന ഉദ്ഘാടന ചടങ്ങിൽ സയ്യിദ് നാദിർ ബിൻ ജലന്ദ അൽ സഈദ് കാർമികത്വം വഹിക്കും. ഉദ്ഘാടന മത്സരത്തിൽ ആതിഥേയരായ ഒമാൻ ഇറ്റലിയെ നേരിടും. മത്സരത്തിനുള്ള ഒരുക്കങ്ങളെല്ലാം പൂർത്തിയായതായി സംഘാടകർ അറിയിച്ചു.
അഞ്ച് ടീമുകൾ വീതം എട്ട് ഗ്രൂപ്പുകളിലായാണ് മാറ്റുരക്കുന്നത്. യു.എസ്, ഇറ്റലി, കാനഡ, ഖത്തർ എന്നിവക്കൊപ്പം ഗ്രൂപ് ഒന്നിലാണ് ഒമാൻ. ജർമനി, ബൾഗേറിയ, ജോർജിയ, ലിബിയ, സെർബിയ എന്നിവർ ഗ്രൂപ് രണ്ടിലും മൂന്നിൽ ഗ്രീസ്, ബെൽജിയം, സൈപ്രസ്, കുവൈത്ത്, ഇറാഖ് എന്നിവരുമാണ്.
ബ്രസീൽ, ഈജിപ്ത്, അയർലൻഡ്, കൊളംബിയ, ഇറാൻ എന്നിവരടങ്ങുന്നതാണ് ഗ്രൂപ് നാല്. പോളണ്ട്, ഫ്രാൻസ്, തുർക്കി, പാകിസ്താൻ, ഹെയ്തി എന്നിവരാണ് അഞ്ചിലുള്ളത്. ആറിൽ മെക്സിക്കോ, ലാത്വിയ, അൽബേനിയ, പെറു, ഓസ്ട്രേലിയ എന്നിവയുണ്ട്. ഗ്രൂപ് ഏഴിൽ കസാഖിസ്താൻ, ഇംഗ്ലണ്ട്, റൊമാനിയ, ഉറുഗ്വേ, സുഡാനും എട്ടിൽ ക്രൊയേഷ്യ, ഹംഗറി, അർജന്റീന, ടുണീഷ്യ, ദക്ഷിണാഫ്രിക്ക എന്നിവയുമാണ് വരുന്നത്. ഓരോ ഗ്രൂപ്പിലെയും മുൻനിരയിലെത്തുന്നവർ അടുത്ത നോക്കൗട്ട് റൗണ്ടിലേക്ക് കടക്കും.
ലോകകപ്പിനെ വരവേക്കാനായി ഒമാൻ ഓട്ടോമൊബൈൽ അസോസിയേഷനിൽ അന്താരാഷ്ട്ര മാനദണ്ഡങ്ങൾക്ക് അനുസൃതമായി ആധുനിക സ്റ്റേഡിയം നിർമിച്ചിട്ടുണ്ട്. കായിക മത്സരങ്ങൾക്ക് അസാധാരണമായ ഒരു പ്ലാറ്റ്ഫോം നൽകാനുള്ള ഒമാന്റെ പ്രതിബദ്ധതയാണ് ഈ അത്യാധുനിക സൗകര്യം പ്രതിഫലിപ്പിക്കുന്നതെന്ന് മിഡിൽ ഈസ്റ്റ് സോക്ക ഫെഡറേഷൻ പ്രസിഡന്റും സംഘാടക സമിതി ഡയറക്ടറുമായ വലീദ് അൽ ഉബൈദാനി അറിയിച്ചു പറഞ്ഞു.
സോക്ക ലോകകപ്പ് ആതിഥേയത്വം വഹിക്കുന്നത് ഒമാനെ സംബന്ധിച്ചിടത്തോളം ഒരു സുപ്രധാന നാഴികക്കല്ലാണെന്നും ആഗോള കായികരംഗത്ത് അതിന്റെ വർധിച്ചുവരുന്ന സാന്നിധ്യം അടിവരയിടുന്നതായും അദ്ദേഹം കൂട്ടിച്ചേർത്തു.
ടൂർണമെന്റിൽ ദിവസവും വൈകീട്ട് നാല് മുതൽ രാത്രി 11 വരെ കുടുംബ, സൗഹൃദ, വിനോദ, സാംസ്കാരിക പരിപാടികളുമുണ്ടായിരിക്കും. ഇത് സന്ദർശകർക്കും പങ്കെടുക്കുന്നവർക്കും ആവേശം പകരുന്നതായിരിക്കും. സോക്ക ലോകകപ്പ് സിക്സ് എ സൈഡ് ഫുട്ബാൾ ടൂർണമെന്റ് ഇന്റർനാഷനൽ സോക്ക ഫെഡറേഷനാണ് നിയന്ത്രിക്കുന്നത്.
2018ൽ പോർച്ചുഗലിലാണ് സോക്ക ലോകകപ്പ് ഫുട്ബാൾ ടൂർണമെന്റ് ആരംഭിക്കുന്നത്. ടൂർണമെന്റ് ഭാവിയിൽ കൂടുതൽ അന്താരാഷ്ട്ര ടൂർണമെന്റുകൾക്ക് ആതിഥേയത്വം വഹിക്കാനുള്ള ഒമാന്റെ സാധ്യതകൾ വർധിപ്പിക്കും.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.