വിജയ്​ ഹസാരെ ട്രോഫി: യു.പിയെ തകർത്ത്​ കേരളം ക്വാർട്ടറിനരികെ

ധർമശാല: തകർപ്പൻ ജയത്തോടെ കേരളം വിജയ്​ ഹസാരെ ട്രോഫി ക്രിക്കറ്റ്​ ടൂർണമ​​െൻറിൽ ക്വാർട്ടർ ഫൈനൽ പ്രതീക്ഷ വർണാഭമാക്കി. കഴിഞ്ഞ കളിയിൽ കരുത്തരായ ഡൽഹിയെ മലർത്തിയടിച്ചിരുന്ന കേരളം അഞ്ചാം മത്സരത്തിൽ ഉത്തർപ്രദേശിനെ 120 റൺസിനാണ്​ തകർത്തുവിട്ടത്​. ഇതോടെ ഗ്രൂപ്​ ബിയിൽ 14 പോയൻറുമായി ​േകരളം രണ്ടാം സ്ഥാനത്തേക്കുയർന്നു. 

ആദ്യം ബാറ്റുചെയ്​ത്​ 50 ഒാവറിൽ ഒമ്പത്​ വിക്കറ്റിന്​​ 261 റൺസടിച്ച കേരളം, ബൗളർമാരുടെ മികവിൽ യു.പിയുടെ ഇന്നിങ്​സ്​ 39.2 ഒാവറിൽ 141  റൺസിലൊതുക്കുകയായിരുന്നു. മൂന്ന്​ വിക്കറ്റ്​ വീതം വീഴ്​ത്തിയ പേസർ സന്ദീപ്​ വാര്യരും ഇട​ൈങ്കയൻ സ്​പിന്നർ കെ.സി. അക്ഷയുമാണ്​ യു.പിയെ തകർത്തത്​. ഒാഫ്​ സ്​പിന്നുമായി രണ്ട്​ പേരെ മടക്കിയ ക്യാപ്​റ്റൻ സചിൻ ബേബിയും ഒാരോ വിക്കറ്റ്​ വീതമെടുത്ത പേസർമാരായ എം.ഡി. നിതീഷും ഫാസിൽ ഫാനൂസും മികച്ച പിന്തുണ നൽകി.  

നേരത്തേ, പിടിച്ചുനിന്ന്​ കളിച്ച രോഹൻ പ്രേമും (95  പന്തിൽ ഏഴ്​ ഫോറടക്കം 66) തകർത്തടിച്ച അരുൺ കാർത്തികും (36 പന്തിൽ നാലു വീതം സിക്​സും ഫോറുമടക്കം 54) നേടിയ അർധ സെഞ്ച്വറികളാണ്​ കേരളത്തി​​​െൻറ ഇന്നിങ്​സിന്​ കരുത്തുപകർന്നത്​. ജലജ്​ സക്​സേന (37), സചിൻ ബേബി (38) എന്നിവരും തിളങ്ങി. യു.പിക്കായി മുഹ്​സിൻ ഖാൻ നാല്​ വിക്കറ്റ്​  വീഴ്​ത്തി. 

കേരളത്തി​​​െൻറ സാധ്യതകൾ
ക്വാർട്ടർ പ്രവേശനം യാഥാർഥ്യമാകണമെങ്കിൽ ശനിയാഴ്​ച നടക്കുന്ന അവസാന കളിയിൽ മഹാരാഷ്​ട്രക്കെതിരെ കേരളത്തിന്​ വിജയം അനിവാര്യം​.  ഏഴ്​ ടീമുകളുള്ള നാല്​ ഗ്രൂപ്പുകളിലെയും ആദ്യ രണ്ട്​ സ്ഥാനക്കാരാണ്​ അവസാന എട്ടിലേക്ക്​ മുന്നേറുക. ആറു മത്സരങ്ങളും പൂർത്തിയാക്കിക്കഴിഞ്ഞ ഡൽഹിയാണ്​ 16 പോയൻറുമായി മുന്നിൽ​. അഞ്ച്​ കളികൾ വീതം കളിച്ച കേരളം, മഹാരാഷ്​ട്ര, ഹിമാചൽ പ്രദേശ്​ ടീമുകൾ​ 14 പോയൻറുമായി തുല്യതയിലാണ്​.

ഹിമാചലിന്​  ദുർബലരായ ബംഗാളാണ്​ അവസാന റൗണ്ടിൽ എതിരാളികൾ. അതിൽ ജയിച്ചാൽ ഹിമാചൽ 18 പോയൻറുമായി ഡൽഹിയെ പിന്തള്ളും. കേരളം-മഹാരാഷ്​ട്ര മത്സര വിജയികൾക്കും 18 പോയ​േൻറാടെ മുന്നേറാം. ​തുല്യ പോയൻറുള്ള  ടീമുകളിൽ കേരളത്തിനാണ്​ റൺറേറ്റ്​  മുൻതൂക്കമെന്നതിനാൽ കേരളം-മഹാരാഷ്​ട്ര കളി നടക്കാതിരിക്കുകയോ ടൈ ആവുകയോ ചെയ്യുകയും ഹിമാചൽ തോൽക്കുകയും ചെയ്​താൽ കേരളത്തിന്​  മുന്നേറാം. അതേസമയം, കേരളം തോറ്റാൽ മഹാരാഷ്​ട്രയും ഡൽഹി, ഹിമാചൽ ടീമുകളിലൊന്നും ക്വാർട്ടറിലെത്തും.