ട്രെയിൻ വൈകുന്നത് തുടർക്കഥ; വൈകിയെത്തിയ വണ്ടി വീണ്ടും പിടിച്ചിട്ടു

പയ്യന്നൂർ: ഒന്നരമണിക്കൂർ വൈകിയെത്തിയ ട്രെയിൻ വീണ്ടും അരമണിക്കൂർ പിടിച്ചിട്ടത് യാത്രക്കാരുടെ പ്രതിഷേധത്തിന ിടയാക്കി. ചൊവ്വാഴ്ച മംഗളൂരു-കോയമ്പത്തൂർ ഇൻറർസിറ്റിയാണ് പയ്യന്നൂർ സ്റ്റേഷനിൽ അരമണിക്കൂർ പിടിച്ചിട്ടത്. ഉച്ചക്ക് 1.05ന് എത്തേണ്ട വണ്ടി 2.45നായിരുന്നു എത്തിയത്. ഈ ട്രെയിനാണ് 3.15ന് പയ്യന്നൂർ വിട്ടത്. മംഗളൂരുവിനും കാഞ്ഞങ്ങാടിനുമിടയിൽ പണിനടക്കുന്നതാണ് വൈകാൻ കാരണമത്രെ. പഴയങ്ങാടി ഭാഗത്തെ പണി തീരാത്തതിനാലാണ് അരമണിക്കൂർ പയ്യന്നൂരിൽ പിടിച്ചിടേണ്ടിവന്നത്. ഇതിനിടയിൽ 3.25ന് എത്തിയ പയ്യന്നൂരിൽ സ്റ്റോപ്പില്ലാത്ത സമ്മർ സ്പെഷൽ ട്രെയിനും അരമണിക്കൂർ മൂന്നാം നമ്പർ പ്ലാറ്റ്ഫോമിൽ പിടിച്ചിട്ടു. ഇൻറർസിറ്റി കടന്നുപോയശേഷം 3.25ന് എത്തിയ ഈ വണ്ടിയാണ് 3.50ന് പയ്യന്നൂരിൽനിന്ന് പോയത്. കൊച്ചുവേളിയിലേക്ക് പോകുന്ന വണ്ടിയാണിത്. മംഗളൂരു-ചെന്നൈ മെയിൽ കടന്നുപോകാനാണ് സമ്മർ സ്പെഷൽ പിടിച്ചിട്ടത്. മൂന്നു മണിക്ക് പയ്യന്നൂരിൽ എത്തേണ്ട മെയിൽ അരമണിക്കൂർ വൈകി മൂന്നരക്കാണ് പയ്യന്നൂരിലെത്തിയത്.