എലിപ്പനി പടരുന്നു; മൂന്നുപേർക്ക് രോഗം

കൽപറ്റ: ജില്ലയിൽ എലിപ്പനി ബാധിതരുടെ എണ്ണം കൂടുന്നു. വെള്ളിയാഴ്ച മൂന്നുപേർക്ക് രോഗം സ്ഥിരീകരിച്ചു.രണ്ടുപേർ രോഗലക്ഷണങ്ങളോടെ ചികിത്സ തേടി. ഈ മാസം ഇതുവരെ നാലുപേർക്ക് രോഗം സ്ഥിരീകരിക്കുകയും അഞ്ചുപേർ രോഗ ലക്ഷണങ്ങളോടെ ചികിത്സ തേടുകയും ചെയ്തു. വെള്ളിയാഴ്ച പുലർച്ച കോഴിക്കോട് ബേബി മെമ്മോറിയൽ ആശുപത്രിയിൽ മരിച്ച കാരക്കാമല സ്വദേശി ആൻറണി (46) എലിപ്പനി ലക്ഷണങ്ങളോടെ ചികിത്സയിലായിരുന്നു.

ഈ വർഷം ഇതുവരെ നാലുപേരാണ് എലിപ്പനി ബാധിച്ച് മരിച്ചത്. അഞ്ചുപേർ രോഗലക്ഷണങ്ങളോടെയും മരിച്ചു. 116 പേർക്കാണ് രോഗം സ്ഥിരീകരിച്ചത്. 217 പേർ രോഗ ലക്ഷണങ്ങളോടെ ചികിത്സ തേടി. 2019ൽ 68 പേർക്കാണ് രോഗം സ്ഥിരീകരിച്ചത്. അഞ്ചുപേർ മരിച്ചു.