രാജമ്മക്ക്​ വീടൊരുങ്ങുന്നു

പന്തളം: സ്വന്തം വീട്ടിൽ അന്തിയുറങ്ങുകയെന്ന രാജമ്മയുടെ സ്വപ്​നം യാഥാർഥ്യത്തിലേക്ക്​. നോട്ടീസ് പതിച്ച് ജപ്തി നടപടികൾ നടപ്പാക്കാനെത്തിയ ബാങ്ക് അധികൃതർതന്നെ മുൻകൈയെടുത്താണ് പന്തളം തോന്നല്ലൂർ ഇളശ്ശേരിൽ രാജമ്മയും സഹോദരങ്ങളായ കൃഷ്ണനും രാജിക്കും വീടുവെച്ചുനൽകുന്നത്. ബാങ്ക് ജീവനക്കാർക്കൊപ്പം നല്ല മനസ്സുകൾകൂടെ ചേർന്നപ്പോൾ പകുതി പണിത വീടുനിന്ന സ്ഥലത്ത് യഥാർഥത്തിൽ വീടുയരുമെന്ന്​ ഉറപ്പായി. തിങ്കളാഴ്ച രാവിലെ 11ഓടെ കട്ടിളവെപ്പ്​ നടത്തി. 2008ൽ ആകെയുള്ള പത്തുസെന്റ് പണയപ്പെടുത്തി കൂരകെട്ടാനായി ജില്ല സഹകരണ ബാങ്ക് പന്തളം ശാഖയിൽനിന്ന്​ ഒരുലക്ഷം രൂപ വായ്പയെടുത്തപ്പോൾ കൂലിവേല ചെയ്ത് അടച്ചുതീർക്കാമെന്നാണ് കരുതിയത്. പിന്നീട് ദുരന്തങ്ങൾ ഇവരെ വേട്ടയാടിക്കൊണ്ടിരുന്നു. പെയിന്റിങ് തൊഴിലാളിയായ കൃഷ്ണൻ കെട്ടിടത്തിന്റെ മുകളിൽനിന്ന് വീണ് തലനാരിഴക്ക്​ രക്ഷപ്പെട്ട് കിടപ്പിലായി. ആകെയുള്ള കൂര തീപിടിത്തത്തിൽ കത്തിയമർന്നു. പണി തുടങ്ങിയ വീട് പകുതിയിൽ മുടങ്ങി. പലിശയടക്കാതെ വായ്പത്തുക ഏറിവന്നു. വായ്പത്തുതുക 2,45000 രൂപവരെ എത്തിയപ്പോൾ ജപ്തി നടപടിയിലെത്തി. ജപ്തിക്കാർ വീട്ടിലെത്തിയപ്പോൾ രാജമ്മക്കും സഹോദരങ്ങൾക്കും ഒരാഗ്രഹമേ ഉണ്ടായിരുന്നുള്ളൂ; അച്ചനപ്പൂപ്പന്മാർ ഉറങ്ങുന്ന മണ്ണ് നഷ്ടമാകരുതേയെന്ന്. ദുരന്തംകണ്ട് സഹായിക്കാനായി ബാങ്ക് ജീവനക്കാർ മുന്നിട്ടിറങ്ങി. മാനേജർ കെ. സുശീല പണമടച്ച് ആദ്യം രംഗത്തിറങ്ങി. പലിശ ഒഴിവാക്കാനുള്ള അനുമതിയും വാങ്ങി. ഓരോ ജീവനക്കാരനും പണം നൽകി. പിരിഞ്ഞുപോയവരുടെയും ജീവനക്കാരുടെയും കൂട്ടായ്മയും കുറച്ച്​ പണം എത്തിച്ചു. 98,828 രൂപ അടച്ച് ആധാരം തിരികെ നൽകി. പകുതി പണിത വീടിന്റെ സ്ഥാനത്ത് ഇവർക്ക് വീട് വെക്കാനായിട്ടായിരുന്നു പിന്നീട് പണം കണ്ടെത്തൽ. സഹായങ്ങൾ ഒഴുകിയെത്തി. തിരുവനന്തപുരം വെള്ളായണി കാർഷിക കോളജിലെ 1980-84 പൂർവ വിദ്യാർഥി കൂട്ടായ്മയാണ് കൂടുതൽ സഹായവുമായി എത്തിയത്. ---------- ഫോട്ടോ: രാജമ്മക്ക്​ നിർമിക്കുന്ന വീടിന്​ കട്ടിളവെക്കുന്നു