താലൂക്ക് വികസന സമിതി തീരുമാനം അട്ടിമറിച്ചവർക്കെതിരെ നടപടിക്ക്​ നീക്കം

റാന്നി: താലൂക്ക് വികസന സമിതിയുടെ തീരുമാനം അട്ടിമറിച്ചവർക്കെതിരെ നടപടി ആവശ്യപ്പെട്ട്​ മുഖ്യമന്ത്രിക്ക്​ നൽകിയ പരാതിയിൽ നടപടിയെടുക്കണമെന്ന്​ പൊതുമരാമത്ത് സെക്രട്ടറിക്ക്​ നിർദേശം. റാന്നി താലൂക്കിൽ പി.ഡബ്ല്യു.ഡിയുടെ നേതൃത്വത്തിൽ നടക്കുന്ന റോഡുകൾ, പാലങ്ങൾ, കെട്ടിടങ്ങൾ എന്നിവയുടെ നിർമാണപ്രവർത്തനങ്ങളിലെ വൻ ക്രമക്കേടുകൾ വിജിലൻസ് അന്വേഷണത്തിൽ പുറത്തുവരാത്തതിനെതുടർന്ന് റാന്നി മന്ദിരം കാറ്റാടിക്കൽ അനിൽ കുമാർ നൽകിയ പരാതിയിൽ ജുഡീഷ്യൽ അന്വേഷണത്തിന്​ റാന്നി താലൂക്ക് വികസന സമിതി ശിപാർശ ചെയ്​തിരു​ന്നു. ഇത്​ നടപ്പാക്കാത്ത ഉദ്യോഗസ്ഥർക്കെതിരെ നടപടി ആവശ്യപ്പെട്ടും ഈ വർക്കുകളുടെ തുക നൽകുന്നത് നിർത്തിവച്ച്​ ജുഡീഷ്യൽ അന്വേഷണം എത്രയുംവേഗം നടപ്പാക്കി ഇതിലെ അഴിമതി പുറത്തുകൊണ്ടുവരണമെന്നും കാട്ടി മുഖ്യമന്ത്രിക്കു നൽകിയ പരാതിയിലാണ് നടപടി. പരാതിയിൽ മനുഷ്യാവകാശ കമീഷനും കേസെടുത്തിട്ടുണ്ട്. വികസന സമിതി തീരുമാനം കത്തിലൂടെ ജില്ല കലക്​ടക്ക്​ റിപ്പോർട്ട്‌ ചെയ്​തെങ്കിലും പൊതുമരാമത്ത് റോഡ് ഡിവിഷനോട്​ മാത്രമാണ് റിപ്പോർട്ട്‌ ആവശ്യപ്പെട്ടതെന്ന് അനിൽകുമാർ പറഞ്ഞു. ബിൽഡിങ്​ വിഭാഗത്തിനോടോ പാലം വിഭാഗത്തിനോടോ ഒന്നും ചോദിച്ചിട്ടില്ല. പൊതുമരാമത്ത് എക്സിക്യൂട്ടിവ് എൻജിനീയറുടെ ഓഫിസ് ഇതിന്​ നടപടി സ്വീകരിച്ചില്ലെന്ന് മാത്രമല്ല, റാന്നി ഓഫിസിന്​ കത്തുനൽകി എന്ന് പരാതികാരനെ അറിയിക്കുകയും ചെയ്തു. എന്നാൽ, ഈ കത്ത് ഇതുവരെയും റാന്നി ഓഫിസിൽ എത്തിയിട്ടി​െല്ലന്ന് രേഖാമൂലം അറിയിച്ചിട്ടുണ്ട്. 2019 ഒക്ടോബറിൽ ഇതിൽ അടിയന്തര റിപ്പോർട്ട്‌ ആവശ്യപ്പെട്ട് ജില്ല കലക്​ടറേറ്റിൽനിന്ന്​ പൊതുമരാമത്ത് എക്സിക്യൂട്ടിവ് എൻജിനീയർക്ക് നൽകിയ കത്തും ഈ ഓഫിസിൽനിന്ന്​ 100 മീ. മാത്രം ദൂരമുള്ള ഇ.ഇ ഓഫിസിൽ 15 മാസങ്ങൾക്കുശേഷവും എത്തിയിട്ടില്ലെന്ന് രേഖാമൂലം അറിയിച്ച സാഹചര്യത്തിലാണ്‌ മുഖ്യമന്ത്രിയുടെ ഓഫിസിന്​ പരാതി നൽകിയത്.