മാത്തൂരിൽ വീട്ടിനുള്ളിൽ മൂന്നുമാസത്തോളം പഴക്കമുള്ള മൃതദേഹാവശിഷ്​ടം

കൊലക്കേസ്​ പ്രതിയുടേതെന്ന്​ സൂചന മാത്തൂർ: മാത്തൂർ കൂമൻകാട്ടിൽ വീടിനുള്ളിൽ യുവാവിന്‍റേതെന്ന്​ കരുതുന്ന മൃതദേഹാവശിഷ്​ടങ്ങൾ കണ്ടെത്തി. മൂന്നുമാസത്തോളം പഴക്കമുണ്ടെന്നാണ്​ പൊലീസിന്‍റെ പ്രാഥമിക നിഗമനം. 2019ൽ കൂമൻകാട് മൈലപ്പറമ്പിലെ ഓമനയെ കൊലപ്പെടുത്തിയ കേസിലെ പ്രതിയായ മാത്തൂർ കൂമൻകാട് ഷൈജു താമസിച്ചിരുന്ന വീട്ടിലാണ്​ മൃതദേഹാവശിഷ്ടങ്ങൾ കണ്ടെത്തിയത്​. ഇത്​ ഷൈജുവിന്‍റേതാണെന്നാണ്​ പ്രാഥമിക നിഗമനം. 2019ൽ കുളിക്കാൻ പോകുന്ന വഴിയിൽ ഓമനയെ അയൽവാസിയായ ഷൈജു കൊലപ്പെടുത്തി ആഭരണങ്ങൾ കവരുകയായിരുന്നു. പിന്നീട്​ പൊലീസ് ​നടത്തിയ പരിശോധനയിൽ മൃതദേഹം ഷൈജുവിന്‍റെ വീട്ടിലെ കട്ടിലിനടിയിൽ കണ്ടെത്തിയിരുന്നു. തുടർന്ന് ഇയാൾ ജയിലിലായി. ഇതിനു​ശേഷം ഈ വീട് ഉപേക്ഷിച്ച് ഷൈജുവിന്‍റെ മാതാവ് നളിനി മറ്റൊരു മകൻ ബൈജുവിനോടൊപ്പം ചെന്നൈയിലാണ് താമസം. ഷൈജു ജാമ്യത്തിലിറങ്ങിയ ശേഷം എവിടെയാണെന്നറിയില്ലായിരുന്നു. ചെന്നൈയിൽനിന്ന് കഴിഞ്ഞദിവസം കുത്തനൂരിലെ തന്‍റെ വീട്ടിലെത്തിയ നളിനി മാത്തൂരിലെ വീട് വൃത്തിയാക്കാനെത്തിയപ്പോൾ ഉള്ളിൽനിന്ന് കുറ്റിയിട്ട നിലയിലായിരുന്നു. തുടർന്ന്​ ജനാലയിലൂടെ നോക്കിയപ്പോഴാണ് നിലത്ത് അസ്ഥികൂടം കണ്ടത്. തുടർന്ന്​ പൊലീസിനെ അറിയിക്കുകയായിരുന്നു. അസ്ഥികൂടത്തിന്‍റെ മുകൾ ഭാഗം കഴുക്കോലിൽ സാരി കെട്ടി അറ്റത്ത് കുടുക്കിട്ട നിലയിലായിരുന്നു. വസ്ത്രങ്ങളും മറ്റും ഷൈജുവി​ന്‍റേതാണെന്ന് നളിനി തിരിച്ചറിഞ്ഞിട്ടുണ്ടെങ്കിലും ഡി.എൻ.എ പ​രിശോധനയിലേ ഉറപ്പിക്കാനാവൂവെന്ന്​ പൊലീസ് പറഞ്ഞു. ഫോറൻസിക് വിദഗ്​ധർ പരിശോധിച്ച ശേഷം ജില്ല ആശുപത്രി മോർച്ചറിയിലേക്ക് മാറ്റി. PE- PRY - 1 വീട്ടിനുള്ളിൽ അസ്ഥികൂടം കണ്ടെത്തിയതറിഞ്ഞെത്തിയ പൊലീസ്