എംപ്ലോയ്‌മെൻറ്​ എക്‌സ്‌ചേഞ്ചിൽ തിരക്ക് നിയന്ത്രിക്കാന്‍ ക്രമീകരണം

എംപ്ലോയ്‌മൻെറ്​ എക്‌സ്‌ചേഞ്ചിൽ തിരക്ക് നിയന്ത്രിക്കാന്‍ ക്രമീകരണം കണ്ണൂർ: കോവിഡ് പ്രതിരോധത്തി‍ൻെറ ഭാഗമായി ജൂലൈ, ആഗസ്​റ്റ്​ മാസങ്ങളിലെ ഉദ്യോഗാര്‍ഥികളുടെ തിരക്ക് നിയന്ത്രിക്കാന്‍ എംപ്ലോയ്‌മൻെറ്​ എക്‌സ്‌ചേഞ്ച് വഴിയുള്ള സേവനങ്ങള്‍ക്ക് ക്രമീകരണങ്ങള്‍ ഏര്‍പ്പെടുത്തി. രജിസ്‌ട്രേഷന്‍ പുതുക്കല്‍, സര്‍ട്ടിഫിക്കറ്റ് ചേര്‍ക്കല്‍ എന്നീ സേവനങ്ങള്‍ സെപ്​റ്റംബര്‍ 30വരെ www.eemployment.kerala.gov.in എന്ന വെബ്സൈറ്റ് വഴി ഓണ്‍ലൈനായി മാത്രം ലഭിക്കും. എന്നാല്‍ ശരണ്യ, കൈവല്യ തുടങ്ങിയ സ്വയംതൊഴില്‍ പദ്ധതികളുടെ വായ്​പ തിരിച്ചടവ്, എംപ്ലോയ്‌മൻെറ്​ എക്‌സ്‌ചേഞ്ച് വഴി താല്‍ക്കാലിക നിയമനം ലഭിച്ചവരുടെ വിടുതല്‍ സര്‍ട്ടിഫിക്കറ്റ് ചേര്‍ക്കല്‍ എന്നീ സേവനങ്ങള്‍ ബന്ധപ്പെട്ട എംപ്ലോയ്‌മൻെറ്​ എക്‌സ്‌ചേഞ്ചുകള്‍ വഴി നേരിട്ട് ലഭ്യമാക്കും. പുതിയ രജിസ്‌ട്രേഷന്‍, സര്‍ട്ടിഫിക്കറ്റ് ചേര്‍ക്കല്‍, തൊഴില്‍ പരിചയ സര്‍ട്ടിഫിക്കറ്റ് ചേര്‍ക്കല്‍ എന്നിവ www.eemployment.kerala.gov.in എന്ന സൈറ്റ് വഴി ഓണ്‍ലൈനായി നിര്‍വഹിക്കാം. അസ്സല്‍ സര്‍ട്ടിഫിക്കറ്റുകള്‍ ഒക്ടോബര്‍ മുതല്‍ ഡിസംബര്‍ 31നകം അതത് എംപ്ലോയ്‌മൻെറ്​ എക്‌സ്‌ചേഞ്ചില്‍ പരിശോധനക്കായി ഹാജരാക്കണം. 2019 ഡിസംബര്‍ 20നുശേഷം ജോലിയില്‍ നിന്നും നിയമാനുസൃതം വിടുതല്‍ ചെയ്യപ്പെട്ട്​ ഡിസ്​ചാര്‍ജ് സര്‍ട്ടിഫിക്കറ്റ് ഹാജരാക്കുന്ന ഉദ്യോഗാര്‍ഥികള്‍ക്ക് 2020 ഡിസംബര്‍ 31 വരെ സീനിയോറിറ്റി നിലനിര്‍ത്തി വിടുതല്‍ സര്‍ട്ടിഫിക്കറ്റ് ചേര്‍ത്തുനല്‍കും. ജനുവരി മുതല്‍ സെപ്​റ്റംബര്‍ വരെ രജിസ്‌ട്രേഷന്‍ പുതുക്കേണ്ടവര്‍ക്ക്​ ഡിസംബര്‍ 31 വരെ രജിസ്‌ട്രേഷന്‍ പുതുക്കല്‍ അനുവദിക്കും. 2019 മാര്‍ച്ചിലോ അതിനുശേഷമോ രജിസ്‌ട്രേഷന്‍ പുതുക്കേണ്ട പട്ടികജാതി /പട്ടികവര്‍ഗ വിഭാഗത്തിൽപെട്ട ഉദ്യോഗാര്‍ഥികള്‍ക്കും ഈ ആനുകൂല്യം ഡിസംബര്‍ 31വരെ ലഭിക്കും. ഈ കാലയളവില്‍ ഉദ്യോഗാര്‍ഥികള്‍ ഫോണ്‍ /ഇ-മെയില്‍ മുഖേന അതത് എംപ്ലോയ്‌മൻെറ്​ എക്‌സ്‌ചേഞ്ചില്‍ ബന്ധപ്പെട്ടും രജിസ്‌ട്രേഷന്‍ പുതുക്കാം. ഫോണ്‍: 0497 2700831 (കണ്ണൂര്‍), 0490 2474700 (മട്ടന്നൂര്‍), 0460 2209400 (തളിപ്പറമ്പ്), 0490 2327923 (തലശ്ശേരി). ഇ- മെയില്‍: deeknr.emp.lbr@kerala.gov.in (കണ്ണൂര്‍), teetpmb.emp.lbr@kerala.gov.in (തളിപ്പറമ്പ്).