കരിപ്പൂർ വിമാന അപകടം: നഷ്ടപരിഹാര വിതരണം പൂർത്തിയായി

188 പേർക്കും പണം നൽകി, ഇനി കിട്ടാനുള്ളത്​ രണ്ട്​ പേർക്കുമാത്രം അബ്ദുൽ റഊഫ്​ മലപ്പുറം: കോഴിക്കോട്​ വിമാനത്താവളത്തിലെ എയർ ഇന്ത്യ എക്സ്​പ്രസ്​ വിമാനാപകടത്തി​ൽ പരിക്കേറ്റവർക്കും മരിച്ചവരുടെ ​ആശ്രിതർക്കും നഷ്ടപരിഹാര വിതരണം പൂർത്തിയായി. പരി​ക്കേറ്റ രണ്ടു​പേർക്ക്​ മാത്രമാണ്​ ഇനി തുക ലഭിക്കാനുള്ളത്​. അപകടം നടന്ന്​ രണ്ട്​ വർഷത്തിനകംതന്നെ നഷ്ടപരിഹാരം കൈമാറാൻ സാധിച്ചു​. പൈലറ്റും കോപൈലറ്റും ഉൾപ്പെടെ മരിച്ച 21 പേരുടെ ബന്ധുക്കൾക്ക്​ തുക നൽകി. നഷ്ടപരിഹാരമായി ലഭിച്ച തുകയിൽ തൃപ്തരാണെന്ന്​ യാത്രക്കാരും ആശ്രിതരും ​പറയുന്നു. പരിക്കേറ്റവരുടെ ചികിത്സ ചെലവും വിമാനക്കമ്പനിയാണ്​ വഹിച്ചത്​. ​ദുബൈയിൽ ജോലി ചെയ്യുന്ന ഒരാൾക്കും മലപ്പുറം താനൂർ സ്വദേശിക്കും മാത്രമാണ്​ ഇനി പണം ലഭിക്കാനുള്ളത്​. പരിക്കിന്‍റെ അവസ്ഥ, തുടർചികിത്സക്ക്​ വരുന്ന ചെലവ്​, പരിക്ക്​ ജീവിതത്തിൽ ഉണ്ടാക്കിയ ആഘാതം, വരുമാനം എന്നിവ കണക്കാക്കിയാണ്​ നഷ്ടപരിഹാരം നിർണയിച്ചത്​. നഷ്ടപരിഹാര വിതരണം വേഗത്തിലാക്കാൻ എയർ ഇന്ത്യ എക്സ്​​പ്രസ്​ കോഴിക്കോട്ട്​ നിരവധി തവണ അദാലത്ത്​ സംഘടിപ്പിച്ചിരുന്നു. ആശ്രിതർക്കും പരിക്കേറ്റവർക്കും ഓഫർ ലെറ്ററും നൽകി. തുടർന്നാണ്​ അന്തിമ തുക നിശ്ചയിച്ച്​ അക്കൗണ്ടിലേക്ക്​ കൈമാറിയത്​. വിമാനത്തിൽ ക്രൂ ഉൾപ്പെടെ 190 പേരാണ്​ ഉണ്ടായിരുന്നത്​. 18 പേർ അപകടദിവസവും മൂന്നുപേർ ചികിത്സയിലിരിക്കെയുമാണ്​ മരിച്ചത്​. 169 പേർക്കാണ്​ പരിക്കേറ്റത്​. 76 പേരുടേത്​​ ഗു​രുതര പരിക്കായിരുന്നു​. അപകടത്തിൽപെട്ടവരിൽ 122 പേരാണ്​ വിമാനക്കമ്പനിയുമായി നേരിട്ട്​ ഇടപെട്ടത്​. ബാക്കിയുള്ളവർ യു.എ.ഇ, അമേരിക്ക എന്നിവിടങ്ങളിലെ നിയമസ്ഥാപനം മുഖേനയാണ്​ നഷ്ടപരിഹാരത്തിന്​ സമീപിച്ചത്​. ഈ രണ്ട്​ സ്ഥാപനത്തെയും സമീപിച്ചവർക്ക്​ മാത്രമാണ്​ തുക കിട്ടാനുള്ളത്​. ഇന്ത്യയി​ലെ നിയമസ്ഥാപനങ്ങളും അഭിഭാഷകരും മുഖേന വിമാനക്കമ്പനിയെ സമീപിച്ചവർക്കും നഷ്ടപരിഹാരം ലഭിച്ചു. അതേസമയം, 2010 ലെ മംഗളൂരു വിമാനാപകടത്തിൽ മരിച്ച 158 പേരുടെ ആശ്രിതർക്ക്​ നഷ്ടപരിഹാരം പൂർണമായി വിതരണം ചെയ്തിട്ടില്ല. ഇതുമായി ബന്ധപ്പെട്ട കേസുകൾ നടക്കുന്നുണ്ട്​. പലർക്കും കുറഞ്ഞ തുകയാണ്​ ലഭിച്ചത്​.