എൽ.ജെ.ഡി-ജെ.ഡി.എസ് ലയനം;​ ഇന്ന്​ വീണ്ടും ചർച്ച

മലപ്പുറം: ലോക്​ താന്ത്രിക്​ ജനതാദൾ (എൽ.ജെ.ഡി), ജനതാദൾ-എസ്​ (ജെ.ഡി.എസ്​) ലയന ചർച്ച വ്യാഴാഴ്ച​ വീണ്ടും നടക്കും. നേരത്തേ നടന്ന ചർച്ചകളുടെ തുടർച്ചയായാണ്​ വ്യാഴാഴ്ച വീണ്ടും എറണാകുളത്ത്​ രണ്ട്​ പാർട്ടിയുടെയും നേതാക്കൾ കൂടിക്കാഴ്ച നടത്തുന്നത്​. ഇരുപാർട്ടിയുടെയും പ്രസിഡന്‍റുമാരായ​ എം.വി. ശ്രേയാംസ്​ കുമാറിന്‍റെയും മാത്യു ടി. തോമസ്​ എം.എൽ.എയുടെയും നേതൃത്വത്തിൽ നേരത്തേ ചർച്ച നടന്നെങ്കിലും ഭാരവാഹിത്വങ്ങൾ നൽകുന്നത്​ സംബന്ധിച്ച്​ ജെ.ഡി.എസ്​ സംസ്ഥാന കമ്മിറ്റി കൂടിയ ശേഷമേ തീരുമാനം പറയാനാവൂ എന്ന നിലപാടാണ്​ മാത്യു ടി. തോമസ്​ സ്വീകരിച്ചത്​. തുടർന്ന്​ കഴിഞ്ഞ​ ആറിന്​ തൃശൂരിൽ ചേർന്ന ജെ.ഡി.എസ്​ സംസ്ഥാന കമ്മിറ്റി ലയന ചർച്ചക്ക്​ മാത്യു ടി. തോമസ്​, കെ. കൃഷ്ണൻകുട്ടി, നീലലോഹിതദാസൻ​ നാടാർ എന്നിവരെ ചുമതലപ്പെടുത്തി. ഇവർക്കൊപ്പം നേതാക്കളായ ജോസ്​ ​തെറ്റയിൽ, ടി.പി. ദിവാകരൻ, ​കെ.എസ്​. പ്രദീപ്​കുമാർ, സാബു ജോർജ്​​ എന്നിവരും വ്യാഴാഴ്ചത്തെ ചർച്ചയിൽ പ​ങ്കെടുക്കുമെന്നാണ്​ വിവരം. എൽ.ജെ.ഡിക്കായി എം.വി. ശ്രേയാംസ്‌കുമാർ, ഡോ. വർഗീസ് ജോർജ്, കെ.പി. മോഹനൻ എം.എൽ.എ, ചാരുപാറ രവി, വി. കുഞ്ഞാലി, എം.കെ. ഭാസ്കരൻ, സണ്ണി തോമസ് എന്നിവരടങ്ങുന്ന ഏഴംഗ സമിതിയാണുണ്ടാവുക. ദേശീയ നേതൃത്വം ആർ.ജെ.ഡിയിൽ ലയിച്ചപ്പോൾ ഇതിൽനിന്ന്​ വിട്ടുനിന്ന എൽ.ജെ.ഡി സംസ്ഥാന നേതൃത്വം പാർട്ടിയുടെ അസ്തിത്വംതന്നെ ചോദ്യം ചെയ്യ​പ്പെടുന്ന ഘട്ടം വന്നപ്പോഴാണ്​ സോഷ്യലിസ്റ്റ് പാർട്ടികളായ ആർ.ജെ.ഡി, ജെ.ഡി.എസ്​, സമാജ്​വാദി പാർട്ടി എന്നിവയിലൊന്നിൽ ലയിക്കാൻ തീരുമാനിച്ചത്​. ലയിച്ചാലും സംസ്ഥാന പ്രസിഡന്‍റ്​, മന്ത്രിപദവി എന്നിവ വിട്ടുനൽകാനാവില്ലെന്ന നിലപാടിലാണ്​ ജെ.ഡി.എസ്​. സംഘടനാതെരഞ്ഞെടുപ്പ്​ പൂർത്തിയാക്കി അടുത്തിടെ പ്രഖ്യാപിച്ച ജില്ല പ്രസിഡന്‍റുമാരെ പിൻവലിക്കാനാവില്ലെന്നും നേരത്തേ പറഞ്ഞിരുന്നെങ്കിലും ഇതിലിപ്പോൾ വിട്ടുവീഴ്ചക്ക്​ തയാറായിട്ടുണ്ട്​. അതേസമയം, പ്രസിഡന്‍റ്​ പദവി ലഭിച്ചില്ലെങ്കിൽ സെക്രട്ടറി ജനറൽ, സീനിയർ വൈസ്​ പ്രസിഡന്‍റ്​, പാർലമെന്‍ററി ബോർഡ്​ ചെയർമാൻ പദവികൾ കിട്ടണമെന്നതാണ്​ എൽ.ജെ.ഡി നിലപാട്​. ചർച്ചയിൽ തീരുമാനമായാൽ എം.പി. വീരേന്ദ്രകുമാറിന്‍റെ രണ്ടാം ചരമവാർഷിക ദിനമായ മേയ് 28ന് കോഴിക്കോട്ട്​ സമ്മേളനവും റാലിയും നടത്തി ലയനം പ്രഖ്യാപിക്കും​.