നിരന്തരം സംഘ്പരിവാർ വേദിയിൽ; ഡി.സി.സി അംഗത്തിനെതിരെ നടപടി

കോഴിക്കോട്:​ സംഘ്പരിവാർ വേദിയിലുൾപ്പെടെ നിരന്തരം പ​ങ്കെടുക്കുന്നുവെന്ന്​ പരാതിയുയർന്ന ഡി.സി.സി അംഗത്തിനെതിരെ പാർട്ടി നടപടി. കൊളത്തൂർ സ്വദേശി രാജീവൻ ​കൊളത്തൂരിനെയാണ്​ ഡി.സി.സി പ്രസിഡന്‍റ്​ അഡ്വ. കെ. പ്രവീൺകുമാർ സംഘടനാപ്രവർത്തനങ്ങളിൽനിന്ന്​ മാറ്റിനിർത്തിയത്​. അതേസമയം, സംഘ്പരിവാർ സംഘടനകൾ ഞായറാഴ്​ച ​കൊളത്തൂർ ശ്രീശങ്കര വിദ്യാമന്ദിരം ഗ്രൗണ്ടിൽ സംഘടിപ്പിക്കുന്ന രക്ഷാബന്ധൻ മഹോത്സവത്തിൽ രാജീവൻ ​കൊളത്തൂരാണ്​ അധ്യക്ഷൻ. രക്ഷാബന്ധൻ മഹോത്സവം സംബന്ധിച്ച്​ പുറത്തിറക്കിയ നോട്ടീസിൽ അധ്യക്ഷനായി രാജീവൻ ​കൊളത്തൂരിന്‍റെ പേര്​ ചേർത്തിട്ടുമുണ്ട്​. ചടങ്ങിൽ ടി.പി. രാജൻ പ്രഭാഷണം നടത്തും​. നേരത്തേതന്നെ രാജീവൻ സംഘ്പരിവാർ നിയന്ത്രണത്തിലുള്ള കൊളത്തൂർ അദ്വൈതാശ്രമത്തിലെയടക്കം പരിപാടികളിൽ പ​ങ്കെടുത്തത്​ കടുത്ത വിമർശനങ്ങൾക്കിടയാക്കിയിരുന്നു. പ്രാദേശിക നേതാക്കൾ തന്നെ വിഷയം ഇദ്ദേഹത്തിന്‍റെ ശ്രദ്ധയിൽപെടുത്തിയിട്ടും പാർട്ടി നിലപാടിന്​ വിരുദ്ധമായ സമീപനങ്ങളാണ്​ തുടർന്നും ഉണ്ടായത്​​. ഇതോടെ രാജീവനെതിരെ അച്ചടക്ക നടപടി സ്വീകരിക്കണമെന്നാവശ്യപ്പെട്ട്​ നന്മണ്ട മണ്ഡലം കോൺഗ്രസ് കമ്മിറ്റി ഡി.സി.സിക്ക്​ പരാതി നൽകുകയായിരുന്നു. പരാതിയിൽ അന്വേഷണം നടത്തി റിപ്പോർട്ട് സമർപ്പിക്കാൻ ജില്ല ജനറൽ സെക്രട്ടറി മഠത്തിൽ നാണുവിനെ​ ഡി.സി.സി പ്രസിഡന്‍റ്​ നിയോഗിച്ചിട്ടുണ്ട്​. അന്വേഷണ റിപ്പോർട്ട്​ ലഭ്യമാകുന്നതുവരെ രാജീവനെ സംഘടനാപ്രവർത്തനങ്ങളിൽനിന്ന് മാറ്റിനിർത്താനുമാണിപ്പോൾ തീരുമാനിച്ചത്​. ഇക്കാര്യം അറിയിച്ച്​ രാജീവൻ ​കൊളത്തൂരിനും ചേളന്നൂർ ബ്ലോക്ക്​​ കോൺഗ്രസ്​ പ്രസിഡന്‍റ്​ ടി.കെ. രാജേന്ദ്രനും നന്മണ്ട മണ്ഡലം പ്രസിഡന്‍റ്​ വിശ്വൻ നന്മണ്ടക്കും ഡി.സി.സി പ്രസിഡന്‍റ്​ കത്തും നൽകി. പാർട്ടിയുടെ ഐക്യത്തിനും കെട്ടുറപ്പിനും യോജിക്കാത്ത പ്രവൃത്തികൾ നിരന്തരം ചെയ്യുന്നതായി മണ്ഡലം കമ്മിറ്റി തന്നെ ചൂണ്ടിക്കാട്ടിയതിനുപിന്നാലെ സംഘ്പരിവാർ വേദിയിൽ വീണ്ടും പോകുന്ന സാഹചര്യമുണ്ടായാൽ പുറത്താക്കൽ നടപടിയുണ്ടായേക്കുമെന്നാണ്​ സൂചന​.