കൂടിന് തീപിടിച്ച് 12 ആടുകളും 15 മുയലുകളും ചത്തു

ചാമംപതാൽ: കൂടിനു തീപടർന്ന് 12 ആടുകളും 15 മുയലുകളും ചത്തു. ചാമംപതാൽ കൊച്ചുതുണ്ടിയിൽ ടി.കെ.എം. അയ്യൂബിന്‍റെ ആട്ടിൻകൂടിനാണ് തീപിടിച്ചത്. വ്യാഴാഴ്ച രാവിലെ ആടിന് ഭക്ഷണം ചൂടാക്കുന്നതിന് കൂടിന് സമീപത്ത് തീകത്തിച്ചിരുന്നു. ഇതിൽനിന്ന് തീ പടർന്നതാകാമെന്ന് കരുതുന്നു. വലിയ പത്ത് ആടുകളും രണ്ട് കുട്ടികളുമാണ് ചത്തത്. കോഴിക്കൂട് തുറന്ന് വിട്ടിരുന്നതിനാൽ അവ രക്ഷപ്പെട്ടു. ഏകദേശം ഒന്നര ലക്ഷം രൂപയുടെ നഷ്ടം കണക്കാക്കുന്നു.

വൈകീട്ട് നാലോടെയാണ് തീപടർന്നത് ശ്രദ്ധയിൽപെട്ടത്. കുടിവെള്ള വിതരണത്തിനെത്തിയ അഞ്ചുപറയിൽ ഫൈസലിന്‍റെ നേതൃത്വത്തിൽ തീയണക്കാൻ ശ്രമിച്ചെങ്കിലും സാധിച്ചില്ല. കാഞ്ഞിരപ്പള്ളിയിൽനിന്ന്‌ അഗ്നിരക്ഷാ സേനയെത്തിയാണ് തീപൂർണമായി അണച്ചത്.