ബസുകൾ കൂട്ടിയിടിച്ച് 10 പേർക്ക് പരിക്ക്

കോട്ടയം: പാമ്പാടി കോത്തല റോഡിൽ കെ.എസ്.ആർ.ടി.സി ബസും സ്വകാര്യ ബസും കൂട്ടിയിടിച്ച് 10 പേർക്ക് പരിക്ക്. വ്യാഴാഴ്ച വൈകീട്ട് ദേശീയപാത 183 കോത്തല മണ്ണാത്തിപ്പാറ ഇറക്കത്തിലായിരുന്നു അപകടം. ആരുടെയും പരിക്ക് ഗുരുതരമല്ല.

കോട്ടയത്തുനിന്ന് കുമളിക്കു പോവുന്ന കെ.എസ്.ആർ.ടി.സി ബസും കോട്ടയത്തേക്ക് പോവുന്ന ഹരിശ്രീ ബസുമാണ് കൂട്ടിയിടിച്ചത്.പരിക്കേറ്റവരെ സമീപത്തെ പാമ്പാടി താലൂക്ക് ആശുപത്രിയിൽ പ്രഥമ ശുശ്രൂഷ നൽകി വിട്ടയച്ചു. അപകടത്തെ തുടർന്ന് റോഡിൽ ഗതാഗത തടസ്സം നേരിട്ടു. പാമ്പാടി പൊലീസും അഗ്നിശമനസേനയും എത്തിയാണ് ഗതാഗതം പുനഃസ്ഥാപിച്ചത്.