നാട്ടുകോഴികൾക്കൊപ്പം ചിക്കിച്ചികഞ്ഞ് കാട്ടുകോഴികളും

ചെറുവത്തൂർ: നാട്ടുകോഴികൾക്കൊപ്പം ചിക്കിച്ചികഞ്ഞ് കാട്ടുകോഴികളും. പിലിക്കോട് എരവിലെ കെ.വി. പത്മനാഭ​െൻറ വീട്ടിലാണ് കോഴികൾക്കൊപ്പം നാല് കാട്ടുകോഴികളും വളരുന്നത്. ഒന്നിച്ച് നടക്കുകയും ഇരതേടുകയും ചെയ്യുമെങ്കിലും ഇടക്ക് ഇവ ഇടയും.

വളരെ ഉയരമുള്ള മരത്തിലേക്ക് പറക്കുകയും വേഗത്തിൽ ഓടുകയും ചെയ്യും. വീടിനുസമീപത്തെ പിലിക്കോട് പ്രാദേശിക കാർഷിക ഗവേഷണ കേന്ദ്രത്തിലെ കുറ്റിക്കാട്ടിൽനിന്നാണ് ആദ്യമായി കാട്ട്​ പൂവൻകോഴി ഇവിടേക്ക് എത്തിയത്.

നാടൻ കോഴികളുമായി ഇണങ്ങുകയും ഇണചേരുകയും ചെയ്​തതിനെ തുടർന്നാണ് നാല് കുഞ്ഞുങ്ങൾ വിരിഞ്ഞത്. പരിചയമുള്ളവരൊഴികെ മറ്റ് ആരെ കണ്ടാലും ഇവ ഓടിയൊളിക്കും.

സാധാരണ കോഴികൾക്കൊപ്പം തന്നെയാണ് ഇവ കഴിയുന്നതും. ധാന്യം, കിഴങ്ങ്, പഴങ്ങൾ എന്നിവയാണ് പ്രധാന ഭക്ഷണം.