കൃഷിത്തോട്ടങ്ങളിൽ കാട്ടാനകളുടെ വിളയാട്ടം

മറയൂർ: കാട്ടാനശല്യം അതിരൂക്ഷമായിട്ടും വനം വകുപ്പിന്‍റെ മൗനം തുടരുന്നു. സ്ഥിരമായി കാട്ടാനകൾ കൃഷിത്തോട്ടത്തിൽ എത്തി വിളകൾ നശിപ്പിക്കുകയാണ്​. കർഷകർക്ക് ലക്ഷങ്ങളുടെ സാമ്പത്തികനഷ്ടമാണ് ഇതുമൂലം ഉണ്ടാകുന്നത്. വെള്ളിയാഴ്ച രാത്രി വെട്ടുകാട്ടിൽ എത്തിയ കാട്ടാനക്കൂട്ടം അനീഷിന്‍റെ ഫാം ഹൗസ് പരിസരത്ത് വാഴ, കമുക്, പച്ചക്കറി കൃഷി വിളകൾ പൂർണമായും നശിപ്പിച്ചു. പുലർച്ച മൂന്നിനാണ്​ കാട്ടാനകൾ എത്തിയത്. അയൽവാസിയായ ഓമന സുബ്രഹ്മണ്യൻ വീടിന്​ സമീപത്ത് ശബ്ദം കേട്ട് പുറത്തിറങ്ങി നോക്കുമ്പോൾ കാട്ടാനകൾ 10 മീറ്റർ ദൂരത്തിൽ നിൽക്കുന്നത്​ കണ്ട് ഭയന്ന് വീട്ടിൽ കയറുകയായിരുന്നു. കെട്ടുറപ്പില്ലാത്ത വീടായതിനാൽ ആനയുടെ ആക്രമണം ഉണ്ടാകുമോയെന്ന്​ ഭയന്നാണ്​ ഇവർ കഴിയുന്നത്​. ആന വീണ്ടും എത്തുമെന്ന ഭീതിയും ഉണ്ട്. കീഴാന്തൂർ കുളച്ചിവയൽ മേഖലയിൽ ശീതകാല പച്ചക്കറിവിളകളായ കാരറ്റ്, കാബേജ്, ബീൻസ്, സ്ട്രോബറി, വെളുത്തുള്ളി, വാഴ കൃഷികളും നശിപ്പിച്ചിരുന്നു. തുടർച്ചയായി പ്രദേശത്ത് കാട്ടാനക്കൂട്ടം കണ്ടു വരുന്ന സാഹചര്യത്തിൽ കർഷകർ പരാതിപ്പെട്ടെങ്കിലും വനം വകുപ്പ് കാര്യക്ഷമമായ നടപടി സ്വീകരിക്കുന്നില്ലെന്ന്​ കർഷകർ പറയുന്നു. ​TDL ELEPHANT കാട്ടാനകൾ നശിപ്പിച്ച അനീഷിന്‍റെ കൃഷിത്തോട്ടം