ആമയാർ എം.ഇ.എസ്​ സ്കൂളിൽ മീഡിയ, ലാംഗ്വേജ് ലാബ് തുറന്നു

ആമയാർ: വണ്ടന്മേട് എം.ഇ.എസ്​ ഹയർ സെക്കൻഡറി സ്​കൂളിൽ നടപ്പാക്കുന്ന സമഗ്ര വിദ്യാലയ വികസന പദ്ധതിയായ 'വിഷൻ 2025'ന്‍റെ പ്രഖ്യാപനവും മീഡിയ ലാബ്, ലാംഗ്വേജ് ലാബ് എന്നിവയുടെ ഉദ്ഘാടനവും മന്ത്രി റോഷി അഗസ്​റ്റിൻ നിർവഹിച്ചു. ആധുനിക സൗകര്യം പാവപ്പെട്ട വിദ്യാർഥികൾക്ക് ലഭ്യമാക്കുന്നതിന് സ്​കൂൾ മാനേജ്മെന്‍റ്​ നടത്തുന്ന പ്രവർത്തനങ്ങൾക്ക് പിന്തുണ ഉണ്ടാവുമെന്ന് മന്ത്രി ഉറപ്പുനൽകി. സംസ്ഥാന അധ്യാപക അവാർഡ് ജേതാവ് സൈനബ ബീവി ടീച്ചർ, അക്ഷരദീപം പുരസ്​കാര ജേതാവ് സ്​കൂളിലെ ഇംഗ്ലീഷ് അധ്യാപകൻ നോബിൾ ടോം, വിവിധ തലങ്ങളിൽ നേട്ടങ്ങൾ കൊയ്ത വിദ്യാർഥികൾ എന്നിവർക്ക് ചടങ്ങിൽ മന്ത്രി ഉപഹാരങ്ങൾ നൽകി. 'വിഷൻ 2025' പദ്ധതി പ്രകാശനം സ്​കൂൾ മാനേജിങ് കമ്മിറ്റി ചെയർമാൻ അഡ്വ. പി. നൂർ സമീർ നിർവഹിച്ചു. ഡിജിറ്റൽ ഉപകരണങ്ങളുടെ വിതരണം സ്​കൂൾ മാനേജിങ് കമ്മിറ്റി സെക്രട്ടറി പി.എ. ഷാജിമോൻ നിർവഹിച്ചു. വണ്ടന്മേട് ഗ്രാമപഞ്ചായത്ത് പ്രസിഡന്‍റ്​ സിബി എബ്രഹാം, സ്​കൂൾ മാനേജിങ് കമ്മിറ്റി വൈസ്​ ചെയർമാൻ പി.എച്ച്​. അബ്ദുറസാഖ്, ട്രഷറർ ഫൈസൽ കമാൽ, പ്രിൻസിപ്പൽ മുഹമ്മദ്​ റഫീഖ്​, വൈസ്​ പ്രിൻസിപ്പൽ മായ വസുന്ധരാദേവി, പി.ടി.എ പ്രസിഡന്‍റ്​ എം.എ. സിദ്ദീഖ് എന്നിവർ സംസാരിച്ചു. FOTO- TDL MES SCHOOL വണ്ടന്മേട് എം.ഇ.എസ്​ ഹയർസെക്കൻഡറി സ്​കൂൾ മീഡിയ ആൻഡ്​ ലാംഗ്വേജ് ലാബ് ഉദ്ഘാടനം മന്ത്രി റോഷി അഗസ്​റ്റിൻ നിർവഹിക്കുന്നു കേരള കോണ്‍ഗ്രസ് സമര സദസ്സ്​ ഇന്ന് ചെറുതോണി: കേരള കോണ്‍ഗ്രസ് കഞ്ഞിക്കുഴി മണ്ഡലം കമ്മിറ്റി നേതൃത്വത്തില്‍ ശനിയാഴ്ച വൈകീട്ട്​ നാലിന് കഞ്ഞിക്കുഴി ടൗണില്‍ ജനകീയ സമരസദസ്സ്​ സംഘടിപ്പിക്കും. ധനകാര്യ സ്ഥാപനങ്ങള്‍ നടത്തിവരുന്ന ജപ്തി നടപടി നിര്‍ത്തിവെയ്ക്കുക, മൂന്നുലക്ഷം രൂപ വരെയുള്ള കാര്‍ഷിക, കാര്‍ഷികേതര വായ്പകൾ എഴുതിത്തള്ളുക, കൃഷിയിടങ്ങളിലെ വന്യജീവി ശല്യം തടയാന്‍ നടപടി സ്വീകരിക്കുക, കഞ്ഞിക്കുഴിയിലെ പട്ടയവിതരണ നടപടി പുനരാരംഭിക്കുക, നിർമാണ സാമഗ്രികളുടെ വിലക്കയറ്റം തടയുക തുടങ്ങിയ ആവശ്യങ്ങളുന്നയിച്ചാണ്​ സമരം. പാര്‍ട്ടി ഡെപ്യൂട്ടി ചെയര്‍മാന്‍ കെ. ഫ്രാന്‍സിസ് ജോര്‍ജ് ഉദ്ഘാടനം ചെയ്യും. മണ്ഡലം പ്രസിഡന്‍റ് വിന്‍സന്‍റ് കല്ലിടുക്കില്‍ അധ്യക്ഷതവഹിക്കും. സമരത്തിലുന്നയിച്ച ആവശ്യങ്ങള്‍ സര്‍ക്കാറിന് സമര്‍പ്പിക്കുന്നതിന്​ ഒപ്പുശേഖരണ പരിപാടി പാർട്ടി ജില്ല പ്രസിഡന്‍റ് പ്രഫ. എം.ജെ. ജേക്കബ് ഉദ്ഘാടനം ചെയ്യും.