പ്രളയത്തിൽ തകർന്ന റോഡിന് ഇനി എന്നാണ്​ ശാപമോക്ഷം

ചെറുതോണി: വാത്തിക്കുടി പഞ്ചായത്തിലെ പതിനെട്ടാം വാർഡിൽപ്പെട്ട രണ്ടര കിലോമീറ്റർ മാത്രം ദൂരമുള്ള പ്രളയത്തിൽ തകർന്ന ആന്‍റോപുരം - ചാലിസിറ്റി റോഡിന് നാലുവർഷമായിട്ടും ശാപമോക്ഷമില്ല. കൊച്ചി-മധുര നാഷനൽ ഹൈവേയുമായി ബന്ധിപ്പിക്കുന്ന ബൈപാസ് റോഡ്​ കൂടിയാണിത്. വാത്തിക്കുടി പഞ്ചായത്തിലെ പതിനെട്ടാം വാർഡിൽപ്പെട്ട റോഡ് പ്രധാനമന്ത്രിയുടെ പുനരുദ്ധാരണ പദ്ധതിയിൽപ്പെടുത്തിയതാണ്. ജില്ല പഞ്ചായത്താണ് റോഡ് നന്നാക്കേണ്ടത്. രണ്ടു പ്രളയങ്ങൾക്കും കാലവർഷത്തിനും ശേഷം റോഡിൽ ടാറിങ്​ ഇല്ലെന്ന് നാട്ടുകാർ പറയുന്നു. പലതവണ മണ്ണിട്ടുനികത്തി കുഴിയടച്ചെങ്കിലും കഴിഞ്ഞകാലവർഷത്തിന്​ ശേഷം വീണ്ടും പഴയപടിയായി. ഇവിടെ താമസിക്കുന്ന നൂറിലധികം കുടുംബങ്ങളുടെ ഏക ആശ്രയം പുറം ലോകവുമായി ബന്ധപ്പെടാൻ ഈ റോഡു മാത്രമാണ്. ഒരു രോഗിയെ ആശുപത്രിയിലെത്തിക്കേണ്ടിവന്നാൽ എടുത്തുകൊണ്ടുപോകേണ്ട അവസ്ഥയാണ്​. ----- ഫോട്ടോ തകർന്ന്​ തരിപ്പണമായ ആന്‍റോപുരം - ചാലിസിറ്റി റോഡ്