ഹൈറേഞ്ചിൽ വാഹനാപകടങ്ങൾ പെരുകുന്നു

അശ്രദ്ധമായ ഡ്രൈവിങ്ങും സ്ഥല പരിചയക്കുറവും കാരണം അടിമാലി: ഹൈറേഞ്ചില്‍ വാഹനാപകടങ്ങള്‍ പെരുകുന്നു. കൊക്കകളും ഹെയര്‍പിന്‍ വളവുകളും കയറ്റിറക്കങ്ങളും നിറഞ്ഞ ഹൈറേഞ്ചിലൂടെയുള്ള പാതകളിലെ അശ്രദ്ധമായ ഡ്രൈവിങ്ങാണ്​ അപകടങ്ങള്‍ക്ക് മുഖ്യകാരണമായി ചൂണ്ടിക്കാട്ടുന്നത്​. അടിമാലി-കുമളി, കൊച്ചി-ധനുഷ്‌കോടി ദേശീയപാതകളിലാണ് അപകടങ്ങള്‍ കൂടുതലും റിപ്പോര്‍ട്ട് ചെയ്യുന്നത്. ഹൈറേഞ്ചില്‍ തിരക്കേറിയ ഈ രണ്ട് പാതയില്‍ ദേശീയപാതയുടെ സൗകര്യമില്ലെന്നതാണ് വസ്​തുത. നേര്യമംഗലത്തുനിന്ന് സംസ്ഥാന അതിര്‍ത്തിയായ ബോഡിമെട്ട് വരെ 90 കി.മീ. നീളുന്ന പാതയുടെ ശരാശരി വീതി ഏഴുമീറ്റര്‍മാത്രം. ഇതേ അവസ്ഥയാണ് അടിമാലി -കുമളി പാതക്കും. വനമേഖലയും കൃഷിമേഖലയും തോട്ടം മേഖലയും വാണിജ്യകേന്ദ്രങ്ങളും ഉള്‍പ്പെടുന്ന ഈ പാതകളില്‍ റോഡ് വികസനങ്ങള്‍ക്ക് ഒച്ചിഴയും വേഗമാണ്.1989 ല്‍ നിലവില്‍ വന്നതാണ് കൊച്ചി-ധനുഷ്‌കോടി ദേശീയപാത. ഈ പാതയില്‍ പലയിടത്തും ഒരുവാഹനത്തിന് മാത്രം കടന്നുപോകാനാണ്​ സൗകര്യമുള്ളത്. വിനോദ സഞ്ചാരകേന്ദ്രങ്ങളായ മൂന്നാര്‍, തേക്കടി എന്നിവിടങ്ങളുമായി ബന്ധിപ്പിച്ച റോഡായതിനാല്‍ വിനോദസഞ്ചാരികളാണ് കൂടുതലും. ഇവരുടെ അശ്രദ്ധമായ ഡ്രൈവിങ്​ പലപ്പോഴും അപകടം വിളിച്ചുവരുത്തുന്നു. തമിഴ്നാട്ടിൽനിന്ന്​ എത്തുന്ന ചരക്കുലോറികള്‍ നിരന്തരം മറിഞ്ഞ് അപകടമുണ്ടാകുന്ന സംഭവങ്ങളുമുണ്ട്​. സഹ്യപര്‍വത നിരകളുടെയും നിത്യഹരിത വനങ്ങളുടെയും ഭംഗി നുകര്‍ന്നുള്ള യാത്ര പാതയില്‍ വ്യത്യസ്​തമായ അനുഭവമാണെങ്കിലും ശ്രദ്ധയൊന്നു പാളിയാല്‍ അപകടത്തിലേക്കാകും വീഴുക. കെ.എസ്.ആര്‍.ടി.സി ബസുകള്‍ ഉള്‍പ്പെടെ കൊക്കയിലേക്ക് മറിഞ്ഞുണ്ടായ അപകടങ്ങള്‍ കുറവല്ല. കൊക്കയുള്ള ഭാഗങ്ങൾ മിക്കയിടത്തും പാര്‍ശ്വഭിത്തി കെട്ടി സംരക്ഷിച്ചിട്ടില്ല. ദൂരദേശങ്ങളില്‍നിന്ന് എത്തുന്നവര്‍ക്ക് പാതയെക്കുറിച്ചോ അപകടസാധ്യതയെക്കുറിച്ചോ ധാരണയുണ്ടാകാറില്ല. അപകടത്തിൽപെടുന്നതില്‍ കൂടുതലും ഇവരാണ്.