അപകടങ്ങൾ ഒഴിവാക്കാൻ റോഡിലെ കുഴികളടച്ച് ഒരുകൂട്ടം ഓട്ടോ തൊഴിലാളികൾ

മട്ടാഞ്ചേരി: റോഡുകളിലെ കുഴികൾ നികത്തി അപകടം ഒഴിവാക്കുകയാണ് കൊച്ചിയിലെ ഓട്ടോ തൊഴിലാളികൾ. ഫോർട്ട്​കൊച്ചി, മട്ടാഞ്ചേരി മേഖലകളിലെ റോഡുകൾ വാഹന സഞ്ചാരയോഗ്യമാക്കാനാണ്​ ഇവർ മുന്നിട്ടിറങ്ങിയിരിക്കുന്നത്. കേബിളിനും പെപ്പിടാനുമായി കുഴിച്ച ശേഷം ശരിയാംവിധം മൂടാതെ പോകുകയാണ് പല കരാറുകാരും. അറ്റകുറ്റപ്പണി നടത്താത്ത റോഡുകളിലും വൻകുഴികളാണ് രൂപപ്പെട്ടിരിക്കുന്നത്. നഗരത്തിലെ ചെറുറോഡുകളടക്കമുള്ളവ മഴയത്ത് തകരുകയും പലവിധ പദ്ധതികൾക്ക്​ കുഴിക്കുന്നതും വാഹന യാത്രക്കാരെ ഏറെ വലക്കുകയാണ്. വേനൽ മഴ കനത്തതോടെ ചെറു കുഴികളിൽ വെള്ളക്കെട്ടും കുഴികളും മൂലം ഇരുചക്ര- മുച്ചക്ര വാഹനങ്ങളടക്കമുള്ളവ അപകടത്തിൽപെടുന്നത് പതിവാണ്. നഗരസഭയും ജനപ്രതിനിധികളും ജനകീയ വിഷയങ്ങളിൽ നടത്തുന്ന അവഗണനയിൽ പ്രതിഷേധവുമായാണ് ഓട്ടോ തൊഴിലാളികൾ പൊതു ജനങ്ങളുമായി സഹകരിച്ച് റോഡിലെ കുഴികൾ അടക്കാൻ മുന്നിട്ടിറങ്ങിയത്. ചിത്രം: ഫോർട്ട്​കൊച്ചിയിൽ തകർന്ന റോഡിലെ കുഴി ഓട്ടോ തൊഴിലാളികൾ മണ്ണിട്ടുമൂടുന്നു