കടലാമക്കുഞ്ഞുങ്ങൾ വിരിഞ്ഞിറങ്ങി

വൈപ്പിൻ: നീണ്ട 55 ദിവസത്തെ കാത്തിരിപ്പിനൊടുവിൽ കുഴുപ്പിള്ളി പള്ളത്താംകുളങ്ങര കടല്‍ത്തീരത്ത് വിരിഞ്ഞിറങ്ങിയ കടലാമക്കുഞ്ഞുങ്ങൾ കടലിലേക്കിറങ്ങി. ചൊവ്വാഴ്ച വൈകീട്ട് സോഷ്യൽ ഫോറസ്ട്രിയുടെ നേതൃത്വത്തിലാണ് ബീച്ചില്‍ സംരക്ഷിച്ചുവന്ന കടലാമക്കൂടില്‍നിന്ന്​ 87 കുഞ്ഞുങ്ങളെ കടലിലിറക്കിവിട്ടത്. പള്ളത്താംകുളങ്ങര കടപ്പുറം നിവാസിയായ ദേവദാസ് പുളിക്കലാണ് 55 ദിവസം കടലാമമുട്ടകൾ സംരക്ഷിച്ചുപോന്നത്. കടലാമകൾ മുട്ടയിടാൻ കരയിലേക്കാണ് വരുന്നത്. കരയിൽ വളരെ സുരക്ഷിതമെന്ന്​ തോന്നുന്ന പ്രദേശങ്ങളാണ് കടലാമകൾ മുട്ടയിടാൻ തെരഞ്ഞെടുക്കുന്നത്. മുട്ടയിട്ട് മണൽകൊണ്ട് മൂടി ആമകൾ തിരിച്ച്​ കടലിലേക്ക് പോകുകയാണ് പതിവ്. നായ, കീരി തുടങ്ങിയ ജന്തുക്കളാണ് കൂടുതലായും ഇവയുടെ മുട്ടകൾ തിന്നുനശിപ്പിക്കാറ്. എന്നാൽ, നിരവധിയാളുകൾ കടലാമ സംരക്ഷണത്തിനായി കൂടിന്​ കാവലിരിക്കുകയായിരുന്നുവെന്ന് സോഷ്യൽ ഫോറസ്ട്രി അധികൃതർ പറഞ്ഞു.