എറണാകുളം ബോട്ട് ജെട്ടിയിൽ നിന്നാരംഭിച്ച വനിത നൈറ്റ് വാക്ക് കൊച്ചി സിറ്റി പൊലീസ്
കമീഷണർ കാളിരാജ് മഹേഷ് കുമാർ ഫ്ലാഗ് ഓഫ് ചെയ്യുന്നു
കൊച്ചി: വനിത ദിനത്തോടനുബന്ധിച്ച് കൊച്ചി സിറ്റി പൊലീസിന്റെ നേതൃത്വത്തിൽ സംഘടിപ്പിച്ച ‘നിർഭയ നിശ’ ജില്ല പരിപാടി എറണാകുളം മറൈൻ ഡ്രൈവിൽ സംഘടിപ്പിച്ചു. സ്ത്രീകൾക്ക് പൊതുസ്ഥലങ്ങളിൽ ആത്മവിശ്വാസത്തോടെ സഞ്ചരിക്കാനുള്ള അവകാശവും സുരക്ഷ ബോധവുമുയർത്തുന്നതിനെ ലക്ഷ്യമിട്ടായിരുന്നു പരിപാടി.
എറണാകുളം ബോട്ട് ജെട്ടിയിൽ നിന്നാരംഭിച്ച വനിതാ നൈറ്റ് വാക്ക് കൊച്ചി സിറ്റി പൊലീസ് കമീഷണർ കാളിരാജ് മഹേഷ് കുമാർ ഫ്ലാഗ് ഓഫ് ചെയ്തു. മറൈൻ ഡ്രൈവ് വാക്ക്വേ വഴി ആരംഭിച്ച നൈറ്റ് വാക്ക് മറൈൻ ഡ്രൈവ് റെയിൻബോ ബ്രിഡ്ജിൽ സമാപിച്ചു. തുടർന്ന് റെയിൻബോ ബ്രിഡ്ജിൽ നടന്ന നിർഭയ നിശാ പരിപാടിയിൽ വനിത സെൽ എസ്.ഐ രേഷ്മ സ്വാഗതം ആശംസിച്ചു. ചടങ്ങിൽ കൊച്ചി സിറ്റി ഡെപ്യൂട്ടി പോലീസ് കമീഷണർ അശ്വതി ജിജി അധ്യക്ഷത വഹിച്ചു.
സ്ത്രീകൾക്ക് സുരക്ഷിതമായ സമൂഹം സൃഷ്ടിക്കുന്നതിൽ പൊതുജന പങ്കാളിത്തത്തിന്റെ പ്രാധാന്യവും നിർഭയ നിശയുടെ സന്ദേശവും വിശദീകരിച്ചു. സീരിയൽ-സിനിമ നടി രമ്യ ജോസഫ് പരിപാടി ഉദ്ഘാടനം ചെയ്തു. എറണാകുളം ഡെപ്യൂട്ടി കലക്ടർ പാർവതി ഗോപകുമാർ വനിതദിന സന്ദേശം നൽകി. കൊച്ചി സിറ്റി ഡെപ്യൂട്ടി പോലീസ് കമ്മീഷണർ–2 ഷഹൻഷ ആശംസ നേർന്നു. എഡ്രാക് പ്രസിഡൻറ് രംഗദാസ് പ്രഭു, ജനറൽ സെക്രട്ടറി അജിത് കുമാർ എന്നിവർ പങ്കെടുത്തു. കൊച്ചി സിറ്റി നാർക്കോട്ടിക് സെൽ ആൻഡ് ജൻഡർ ജസ്റ്റിസ് അസിസ്റ്റൻറ് കമീഷണർ സുനിൽ കുമാർ നന്ദി പറഞ്ഞു. പരിപാടിയുടെ ഭാഗമായി സ്വയം പ്രതിരോധ പ്രദർശനവും കൊച്ചി സിറ്റി പൊലീസ് ഓർക്കസ്ട്രയുടെ മ്യൂസിക്കൽ നൈറ്റും സംഘടിപ്പിച്ചു. കൊച്ചി നഗരത്തിലെ വിവിധ റെസിഡൻസ് അസോസിയേഷനുകളിലെ വനിതാ ഭാരവാഹികൾ, നിർഭയ വളന്റിയർമാർ, പൊലീസ് ഉദ്യോഗസ്ഥർ എന്നിവരും പങ്കെടുത്തു. നിരവധി വനിതകൾ നിർഭയ നിശ പരിപാടിക്ക് എത്തി.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.