പത്മാക്ഷിക്കവല ഒരുവഴിയുണ്ടായ കഥയാണ്​; നാടി​ന്​ പേരും

ചേർത്തല: ദേശീയപാതയിൽ ഒരു സ്ത്രീയോടുള്ള ബഹുമാനത്തിൽ അറിയപ്പെടുന്ന​ ഒരുസ്ഥലമുണ്ട്​​. 85 വർഷങ്ങൾക്ക് മുമ്പ് ദേശീയ പാതയിൽനിന്നും അന്ധകാരനഴിയിലേക്ക്​ ഒരുറോഡ് വേണമെന്നാവശ്യം ശക്തമായെങ്കിലും സ്ഥലം വിട്ടുനൽകാൻ ആരും തയാറില്ലായിരുന്നു. കർഷകതൊഴിലാളിയായ പട്ടണക്കാട് പഞ്ചായത്ത് മൂന്നാം വാർഡിൽ വെളിപ്പറമ്പ് കേശവ‍‍ൻെറ ഒന്നര ഏക്കറി‍ൻെറ മധ്യഭാഗത്തിലൂടെ വേണം റോഡ് കടന്നുപോകാൻ. തീരദേശ ഭാഗത്തേക്ക്​ അഞ്ച് കിലോമീറ്റർ നീളത്തിലാണ് റോഡിനായി സ്ഥലം കണ്ടെത്തിയത്. തീരമേഖലയായ അഴീക്കൽ, വെട്ടയ്ക്കൽ, അന്ധകാരനഴി, തൈയ്ക്കൽ, ഒറ്റമശ്ശേരി എന്നീ ഭാഗത്തുള്ളവർക്ക് ആശുപത്രിയിൽ പോകാൻ പോലും റോഡില്ലാത്ത കാലമായിരുന്നത്​. ആരും റോഡിനായി ഒരു സെന്‍റ്​ സ്ഥലം പോലും വിട്ടുനൽകാൻ തയാറില്ല. എന്നാൽ, കേശവൻ 20 സെന്‍റ്​ റോഡിനായി നൽകി. ഈ മാതൃക മൂലം മറ്റാരും പിന്നെ എതിര് പറയാതെ വിട്ടുനൽകി. ഇതിന് ശേഷം റോഡുപണി ആര് ഉദ്ഘാടനം ചെയ്യുമെന്നായി നാട്ടുകാർ. 20 സെന്‍റ്​ നൽകിയ കേശവനെ കൊണ്ട് ഉദ്ഘാടനം ചെയ്യിക്കാൻ നാട്ടുകാർ തീരുമാനമെടുത്തു. അനുമതിക്കായി കേശവനെ കാണാനായി എത്തി. എന്നാൽ, എട്ട് വയസ്സുള്ള മുത്തമകളായ പത്മാക്ഷിയെ കൊണ്ട് ഉദ്ഘാടനം ചെയ്യിക്കണമെന്ന് അദ്ദേഹം നാട്ടുകാരോട് പറഞ്ഞു. തുടർന്ന്​ ചട്ടിയിൽ മണ്ണ് നിറച്ച് തലയിൽ വെച്ച്​ റോഡ് പണിക്ക്​ തുടക്കം കുറിച്ച പത്മാക്ഷി ഇതോടെ നാട്ടുകാരുടെ താരമായി. വർഷങ്ങൾ കഴിഞ്ഞശേഷമാണ് ഇവിടെ റോഡ് പൂർണതോതിലായത്. ദേശീയപാതയോട് ചേർന്ന് കിടക്കുന്ന പത്മാക്ഷിയുടെ സ്ഥലത്ത് ചെറിയ കട കൂടി പണിതപ്പോൾ നാട്ടുകാരുടെ റാണിയായ പത്മാക്ഷിയുടെ പേരിൽ തന്നെ ആ കവലക്ക്​ പേരും ആയി. പത്മാക്ഷി കവല. 2007ൽ വാർധക്യസഹജമായ അസുഖത്തിൽ പത്മാക്ഷി മരിച്ചെങ്കിലും ഇന്നും അവിടെ അറിയപ്പെടുന്നത് പത്മാക്ഷിയുടെ പേരിൽ തന്നെ. പി.ജി. രവികുമാർ APL padmashi kavala ചിത്രം: ദേശീയപാതയിലെ പത്മാക്ഷിക്കവല