ബസ്​ സ്റ്റാൻഡിലാണിത്​​; ഭാഗ്യം മാത്രമാണ്​ രക്ഷയായത്​

–മൂന്നര ലക്ഷത്തിന്‍റെ അറ്റകുറ്റപ്പണിക്ക്​ നടപടിയായെന്ന്​ നഗരസഭ ചെയർമാൻ കാസർകോട്​: പഴയ കെട്ടിടങ്ങളുടെ സീലിങ്​ അടർന്നുവീഴാറുണ്ട്​. എന്നാൽ, വലിയ ഉരുളൻകല്ല്​ വലുപ്പമുള്ള കോൺക്രീറ്റ്​ കട്ടകൾതന്നെ അടർന്നുവീണാൽ എന്താവും സ്ഥിതി. അതും ആളുകൾ തിങ്ങിക്കൂടുന്ന ബസ്​സ്​റ്റാൻഡിൽ. ഭാഗ്യം കൊണ്ടുമാത്രമാണ്​ കാസർകോട്​ പുതിയ ബസ്​സ്റ്റാൻഡിൽ ഒരപകടം ഒഴിവായത്​. ബസ്​സ്റ്റാൻഡി​ലെത്തുന്ന ബസുകളും കാത്തിരിക്കുന്നയിടത്താണ്​ കോൺക്രീറ്റ്​ അടർന്നുവീണത്​. പണിമുടക്ക്​ ദിനമായതിനാലും ആരുമില്ലാത്തതിനാലും അപകടമുണ്ടായില്ല. വർഷങ്ങൾ പഴക്കമുള്ള ഈ കെട്ടിടത്തിന്‍റെ കോൺ​ക്രീറ്റ്​ സീലിങ്​ പലയിടത്തും അടർന്നുവീഴുന്നുണ്ട്​. മേൽക്കൂരയിലെ ബീമുകൾ ദ്രവിച്ചുവീഴുന്നതാണ്​ അപകടസാധ്യത കൂട്ടുന്നത്​. ഇത്​ ശ്രദ്ധയിൽപെട്ടിട്ടുണ്ടെന്നും അറ്റകുറ്റപ്പണിക്കായി മൂന്നര ലക്ഷം രൂപ അനുവദിച്ചതായും കാസർകോട്​ നഗരസഭ ചെയർമാൻ അഡ്വ. വി.എം. മുനീർ പറഞ്ഞു. ടെൻഡറായതായും താമസിയാതെ പ്രവൃത്തി തുടങ്ങാൻ കഴിയുമെന്നും അദ്ദേഹം വ്യക്​തമാക്കി. bus stand roof 1 കാസർകോട്​ പുതിയ ബസ്​ സ്റ്റാൻഡ്​ കെട്ടിടത്തിലെ കോൺക്രീറ്റ്​ അടർന്നുവീണപ്പോൾ bus stand roof കോൺക്രീറ്റ്​ അടർന്നുവീഴുന്ന ഭാഗം