'ഒ​രു രാ​ജ്യം, ഒ​രേ യൂ​നി​ഫോം' നി​ർ​ദേ​ശം മു​ന്നോ​ട്ടുവെ​ച്ച്​ മോ​ദി

ന്യൂ​ഡ​ൽ​ഹി: ഏ​കീ​ക​ര​ണ അ​ജ​ണ്ട​യു​ടെ ഭാ​ഗ​മാ​യി പൊ​ലീ​സ്​ സേ​ന​ക്ക്​ 'ഒ​രു രാ​ജ്യം, ഒ​രേ യൂ​നി​ഫോം' എ​ന്ന ആ​ശ​യം മു​ന്നോ​ട്ടു​വെ​ച്ച്​ പ്ര​ധാ​ന​മ​ന്ത്രി ന​രേ​ന്ദ്ര മോ​ദി. വി​വി​ധ സം​സ്ഥാ​ന​ങ്ങ​ളി​ലെ പൊ​ലീ​സി​ന്‍റെ യൂ​നി​ഫോം ഏ​കീ​ക​രി​ച്ചാ​ൽ സേ​ന​ക്ക്​ ഒ​രേ ത​നി​മ ല​ഭി​ക്കും. പൊ​ലീ​സും ക്ര​മ​സ​മാ​ധാ​ന​വും സം​സ്ഥാ​ന സ​ർ​ക്കാ​റു​ക​ളു​ടെ അ​ധി​കാ​ര പ​രി​ധി​യി​ൽ വ​രു​ന്ന വി​ഷ​യ​മാ​ണ്. അ​തു​കൊ​ണ്ട്​ ഇ​ത്ത​ര​മൊ​രു നി​ർ​ദേ​ശം അ​ടി​ച്ചേ​ൽ​പി​ക്കു​ക​യ​ല്ല, പ​രി​ഗ​ണ​ന​ക്ക് വെ​ക്കു​ക മാ​ത്ര​മാ​ണ്​ ചെ​യ്യു​ന്ന​തെ​ന്നും മോ​ദി വി​ശ​ദീ​ക​രി​ച്ചു.

സം​സ്ഥാ​ന ആ​ഭ്യ​ന്ത​ര​മ​ന്ത്രി​മാ​രു​ടെ സ​മ്മേ​ള​ന​ത്തെ വി​ദൂ​ര ദൃ​ശ്യ സം​വി​ധാ​ന​ത്തി​ലൂ​ടെ അ​ഭി​സം​ബോ​ധ​ന ചെ​യ്യു​ക​യാ​യി​രു​ന്നു പ്ര​ധാ​ന​മ​ന്ത്രി. പൊ​ലീ​സ്​ സേ​ന​ക്ക്​ ഏ​ക​മു​ഖം ന​ൽ​കു​മ്പോ​ൾ ഒ​രേ ഉ​ൽ​പ​ന്നം വ​ൻ​തോ​തി​ൽ നി​ർ​മി​ക്കു​ക വ​ഴി മെ​ച്ച​പ്പെ​ട്ട ഉ​ൽ​പ​ന്ന​ങ്ങ​ൾ ല​ഭ്യ​മാ​കും. നി​യ​മ​പാ​ല​ക​ർ​ക്ക്​ പൊ​തു​രൂ​പം കി​ട്ടും. രാ​ജ്യ​ത്ത്​ എ​വി​ടെ​യും പൊ​ലീ​സി​നെ ജ​ന​ങ്ങ​ൾ​ക്ക്​ വേ​ഗം തി​രി​ച്ച​റി​യാ​നാ​വും. ഓ​രോ സം​സ്ഥാ​ന​ങ്ങ​ൾ​ക്കും വെ​വ്വേ​റെ ന​മ്പ​റോ ചി​ഹ്​​ന​മോ ന​ൽ​കു​ക​യു​മാ​കാം.

യു​വാ​ക്ക​ളെ തീ​വ്ര​വാ​ദ​ത്തി​ലേ​ക്ക്​ ത​ള്ളി​വി​ടു​ന്ന വ​ഴി​പി​ഴ​ച്ച മ​ന​സ്സു​ക​ളു​ടെ സ്വാ​ധീ​ന​ത്തി​നെ​തി​രെ ജാ​ഗ്ര​ത പാ​ലി​ക്കാ​ൻ ആ​ഭ്യ​ന്ത​ര മ​ന്ത്രി​മാ​രോ​ട്​ മോ​ദി നി​ർ​ദേ​ശി​ച്ചു. പേ​ന​യേ​ന്തി​യ​തോ തോ​ക്കേ​ന്തി​യ​തോ ആ​ക​ട്ടെ, ന​ക്സ​ലി​സ​ത്തി​ന്‍റെ എ​ല്ലാ രൂ​പ​ങ്ങ​ളും തു​ട​ച്ചു നീ​ക്ക​ണം. ഐ​ക്യ​വും അ​ഖ​ണ്ഡ​ത​യും ക​ണ​ക്കി​ലെ​ടു​ത്ത്​ അ​ത്ത​രം ശ​ക്തി​ക​ൾ​ക്ക്​ രാ​ജ്യ​ത്ത് പ​ച്ച​പി​ടി​ക്കാ​ൻ അ​വ​സ​രം ന​ൽ​ക​രു​ത്. അ​ക്കൂ​ട്ട​ർ​ക്ക്​ ഗ​ണ്യ​മാ​യ സ​ഹാ​യം വി​ദേ​ശ​ത്തു​നി​ന്ന്​ കി​ട്ടു​ന്നു​ണ്ട്.

കാ​ലം മാ​റി​യ​തി​നൊ​ത്ത്​ പ​ഴ​ഞ്ച​ൻ നി​യ​മ​ങ്ങ​ൾ സം​സ്ഥാ​ന സ​ർ​ക്കാ​റു​ക​ൾ പു​നഃ​പ​രി​ശോ​ധി​ക്ക​ണം. ക്ര​മ​സ​മാ​ധാ​നം ആ​ഭ്യ​ന്ത​ര സു​ര​ക്ഷ എ​ന്നി​വ​യി​ലെ പു​തി​യ വെ​ല്ലു​വി​ളി​ക​ൾ നേ​രി​ടാ​ൻ എ​ല്ലാ ഏ​ജ​ൻ​സി​ക​ളു​ടെ​യും ഏ​കോ​പി​ത പ്ര​വ​ർ​ത്ത​നം ന​ട​ക്ക​ണം. ക്ര​മ​സ​മാ​ധാ​നം സം​സ്ഥാ​ന വി​ഷ​യ​മാ​ണെ​ങ്കി​ലും രാ​ജ്യ​ത്തി​ന്‍റെ ഐ​ക്യ​വും അ​ഖ​ണ്ഡ​ത​യു​മാ​യി തു​ല്യ​ബ​ന്ധം അ​തി​നു​ണ്ട്. ആ​ഭ്യ​ന്ത​ര സു​ര​ക്ഷ​ക്ക്​ സം​സ്ഥാ​ന​ങ്ങ​ൾ കൈ​കോ​ർ​ത്ത്​ നീ​ങ്ങ​ണം. ക്ര​മ​സ​മാ​ധാ​ന​വും സു​ര​ക്ഷ​യും മു​ൻ​നി​ർ​ത്തി എ​ല്ലാ സം​സ്ഥാ​ന​ങ്ങ​ളും വി​വ​രം പ​ങ്കു​വെ​ക്കു​ന്ന സാ​​​ങ്കേ​തി​ക​വി​ദ്യ​യു​ടെ പൊ​തു​വേ​ദി ഉ​ണ്ടാ​ക​ണം. വ്യാ​ജ​വാ​ർ​ത്ത​ക​ൾ പ്ര​ച​രി​ക്കു​ന്ന​ത്​ ത​ട​യാ​ൻ സാ​​ങ്കേ​തി​ക​വി​ദ്യ ഉ​പ​യോ​ഗ​പ്പെ​ടു​ത്ത​ണം. ദേ​ശീ​യ ത​ല​ത്തി​ൽ ത​ന്നെ ഉ​ത്​​ക​ണ്ഠ പ​ര​ത്താ​ൻ വ്യാ​ജ വാ​ർ​ത്ത​ക​ൾ​ക്ക്​ കെ​ൽ​പ്പു​ണ്ട്.

സ​മൂ​ഹ​മാ​ധ്യ​മ​ങ്ങ​ളി​ലെ വി​വ​ര​ങ്ങ​ൾ അ​ന്ധ​മാ​യി പ​ങ്കു​വെ​ക്കു​ന്ന​തി​നു മു​മ്പ്​ പ​രി​ശോ​ധി​ക്കാ​ൻ ജ​ന​ങ്ങ​​ളെ ബോ​ധ​വ​ത്ക​രി​ക്ക​ണം. കു​റ്റ​കൃ​ത്യ​ങ്ങ​ൾ ഇ​ന്ന്​ പ്രാ​ദേ​ശി​ക​മ​ല്ല. അ​തി​ന്​ അ​ന്ത​ർ സം​സ്ഥാ​ന, അ​ന്താ​രാ​ഷ്ട്ര ബ​ന്ധ​വും ഉ​ണ്ടാ​കാം. അ​തു​കൊ​ണ്ടു ത​ന്നെ​ സം​സ്ഥാ​ന ഏ​ജ​ൻ​സി​ക​ൾ ത​മ്മി​ൽ കൂ​ടു​ത​ൽ സ​ഹ​ക​രി​ക്കേ​ണ്ട​തു​ണ്ട്. ഭീ​ക​ര​ത​ക്കെ​തി​രാ​യ പോ​രാ​ട്ട​ങ്ങ​ൾ​ക്ക്​ യു.​എ.​പി.​എ പോ​ലു​ള്ള നി​യ​മ​ങ്ങ​ൾ ശ​ക്തി പ​ക​ർ​ന്നി​ട്ടു​ണ്ടെ​ന്നും ന​രേ​ന്ദ്ര മോ​ദി പ​റ​ഞ്ഞു.