പൊരിവെയിലിൽ  പ്യാർ കാ പാനിയുമായി ലാൽചന്ദ്​ ജി

ദുബൈ: പൊള്ളുന്ന നട്ടുച്ചക്ക്​ ആരാധനക്കെത്തുന്ന വിശ്വാസികൾക്കായി ദുബൈയിലെ പല പള്ളികളിലും വെള്ളക്കുപ്പികൾ സൂക്ഷിച്ചിട്ടുണ്ട്​. എന്നാൽ ബറോഡ പള്ളി എന്നറിയപ്പെടുന്ന ഗുബൈബയിലെ ഹറബ്​ ബിൻ ഹറബ്​ മസ്​ജിദിൽ വെള്ളിയാഴ്​ചകളിൽ ജുമുഅ നമസ്​കാരത്തിനെത്തുന്ന തൊഴിലാളികൾ ഉ​ൾപ്പെടെ ആയിരങ്ങൾക്ക്​ പള്ളിയിൽ സൂക്ഷിച്ച വെള്ളം തികയാറില്ല. പക്ഷെ അവിടെയെത്തുന്ന ഒരാൾ പോലും ദാഹിച്ച്​ മടങ്ങാറുമില്ല. നമസ്​കരിക്കാനുള്ളവർ എത്തും മുൻപേ അവിടെ തെളിനീർ പാത്രങ്ങളുമേറ്റി ഒരാൾ കാത്തു നിൽപ്പുണ്ടാവും.  ലാൽചന്ദ്​ മിർചന്ദാനി എന്ന വയോധികൻ. 

നമസ്​കാര നേരമാകു​േമ്പാഴേക്കും നിറഞ്ഞു കവിയുന്ന പള്ളിയിൽ നിന്ന്​ ചുട്ടുപൊള്ളുന്ന വെയിലിലേക്കിറങ്ങുന്നവർക്ക്​ ലോ ബേട്ടാ, പ്യാർ കാ പാനി ( ഇന്നാ മോനേ സ്​നേഹത്തി​​െൻറ വെള്ളം) എന്നു പറഞ്ഞ്​  തണുത്ത വെള്ളത്തി​​െൻറ ഗ്ലാസുകൾ നീട്ടും. ഏതു നാട്ടുകാരെന്നോ എന്തു ജോലിക്കാരെന്നോ എന്നൊന്നും നോക്കിയല്ല, ആ റോഡിലേക്കിറങ്ങുന്ന മനുഷ്യർക്കെല്ലാം കിട്ടും ഉള്ളം തണുപ്പിക്കുന്ന വെള്ളവും പുഞ്ചിരിയും.  പതിവായി വരുന്നവരോട്​ രണ്ടുവാക്ക്​ കുശലം പറയും, മക്കളെ കൊണ്ടുവന്നില്ലേ എന്നന്വേഷിക്കും. തിരക്കിനിടയിൽ പലർക്കും വെള്ളത്തിനായി കാത്തു നിൽക്കേണ്ടി വരുന്നതിനാൽ മൂന്ന്​ ജീവനക്കാരെയും അദ്ദേഹം കൂടെക്കൂട്ടിയിട്ടുണ്ട്​. പള്ളി മുറ്റത്ത്​ നിന്ന്​ രണ്ടു പേർ വെള്ളം നൽകു​േമ്പാൾ മറ്റു രണ്ടുപേർ സമീപത്തെ റോഡിൽ നിന്ന്​ വിതരണം ചെയ്യും. ചുമയും തൊണ്ടവേദനയുമെല്ലാം കാരണം തണുപ്പിച്ച വെള്ളം കുടിക്കാൻ കഴിയാത്തവർക്ക്​ നൽകാൻ കുറച്ച്​ സാദാ പാനിയും കരുതും.

മുംബൈ സ്വദേശിയായ ലാൽചന്ദിന്​ 81വയസായി. ദുബൈ ദേരയിൽ മഹാരാജ എന്ന പേരിൽ റെഡിമെയ്​ഡ്​ വസ്​ത്ര സ്​ഥാപനം നടത്തുകയാണ്​. മൂന്നു മക്കളും കുടുംബവുമൊത്ത്​ പള്ളിക്കു​ സമീപത്തെ ഫ്ലാറ്റിലാണ്​ താമസം.  40 വർഷം മുൻപ്​ ദുബൈയിലെത്തിയ അദ്ദേഹത്തിന്​ ഇൗ നാട്ടിലെ പ്രകൃതിയോടും ജനങ്ങളോടും പ്രവാസികളോടും ഭരണാധികാരികളോടും ഏറെ മതിപ്പാണ്​. മതങ്ങളുടെ പേരിലെ ഭിന്നിപ്പും തർക്കങ്ങളും താൻ ഇഷ്​ടപ്പെടുന്നില്ലെന്നും ഏവർക്കും ഒരുമയോടെ ജീവിക്കാൻ ഇടം നൽകുന്ന ദുബൈ ഇക്കാര്യത്തിൽ ലോകത്തിന്​ മാതൃകയാണെന്നും അദ്ദേഹം പറയുന്നു. 

വെള്ളം വിതരണം ചെയ്യുന്നതി​​െൻറ ചിത്രമെടുക്കുന്നതിനോട്​ വിയോജിപ്പ്​ പ്രകടിപ്പിച്ച ലാൽചന്ദ്​ജിയോട്​  മറ്റുള്ളവർക്കും പ്രചോദനമാവ​െട്ട എന്നുദ്ദേശിച്ചാണ് പടമെടുത്തത്​ എന്നു പറഞ്ഞപ്പോൾ  ആളുകൾക്ക്​ ദാഹം മൂലം ബുദ്ധിമുട്ടുണ്ടാവരുത്​ എന്ന ലക്ഷ്യം മാത്രമേ തനിക്കൂള്ളൂവെന്നും എത്ര ധനികനും ദാഹിച്ചു വലയുന്ന സമയത്ത്​ ഒരു ഗ്ലാസ്​ വെള്ളം കിട്ടാതെ വന്നാൽ ആ പണം കൊണ്ടൊരു പ്രയോജനവുമി​െല്ലന്നും പറഞ്ഞ്​ നടന്നുനീങ്ങി.