ഈദുൽ ഇത്തിഹാദ്​ ദിനങ്ങളിൽ ജനിച്ച കുഞ്ഞുങ്ങൾക്ക്​ ചൈൽഡ്​ സീറ്റ്​ സമ്മാനം

ദുബൈ: യു.എ.ഇയുടെ 53ാം ദേശീയ ദിന ആഘോഷ വേളകളിൽ ജനിച്ച കുഞ്ഞുങ്ങൾക്ക്​ ചൈൽഡ്​ കാർ സീറ്റുകൾ സമ്മാനമായി നൽകി ദുബൈ റോഡ്​ ഗതാഗത അതോറിറ്റി (ആർ.ടി.എ). ഡിസംബർ ഒന്ന്​ മുതൽ അഞ്ചു വരെ തീയതികളിൽ ദുബൈയിലെ 24 ആശുപത്രികളിലായി ജനിച്ച 450 കുഞ്ഞുങ്ങളുടെ അമ്മമാർക്കാണ്​​ ആർ.ടി.എയുടെ സ്​നേഹസമ്മാനം​.

ദുബൈ പൊലീസ്​, ദുബൈ ഹെൽത്ത്​ അതോറിറ്റി, യൂനിസെഫ്​ എന്നിവയുടെ പിന്തുണയോടെ ‘ഈദുൽ ഇത്തിഹാദിൽ എന്‍റെ കുട്ടിയുടെ സമ്മാനം’ എന്ന പേരിലാണ്​ വേറിട്ട പരിപാടി സംഘടിപ്പിച്ചത്​.

വർഷംതോറും ഡിസംബർ ഒന്നു മുതൽ അഞ്ചു വരെ നടക്കുന്ന ആഘോഷ ദിനങ്ങളിൽ പ്രതീക്ഷിക്കുന്ന ജനനങ്ങളുടെ എണ്ണത്തെ അടിസ്ഥാനമാക്കി ആശുപത്രികൾക്ക്​ ചൈൽഡ്​ കാർ സീറ്റുകൾ വിതരണം ചെയ്യാറുണ്ടെന്ന്​ ആർ.ടി.എയുടെ ട്രാഫിക്​ ആൻഡ്​ റോഡ്​സ്​ ഏജൻസി സി.ഇ.ഒ ഹുസൈൻ അൽ ബന്ന പറഞ്ഞു. ദുബൈ ട്രാഫിക്​ സ്​ട്രാറ്റജിക്ക്​ കീഴിൽ വരുന്ന കമ്യൂണിറ്റി ഗ്രൂപ്പുകളെ കേന്ദ്രീകരിച്ച്​ നടത്തുന്ന ബോധവത്​കരണത്തിന്‍റെ ഭാഗമായാണ്​ പരിപാടി.

കഴിഞ്ഞ അഞ്ചു വർഷത്തിനിടെ ഈ സംരംഭത്തിന്​ കീഴിൽ 2000 കുട്ടികൾക്ക്​​ ചൈൽഡ്​ കാർ സീറ്റുകൾ വിതരണം ചെയ്തിട്ടുണ്ട്​. ഡ്രൈവിങ്ങിനിടെ കുഞ്ഞുങ്ങൾ നിശ്ചിത കാർ സീറ്റുകളിൽ ഇരിക്കുന്നുവെന്ന്​ ഉറപ്പുവരുത്തേണ്ടത്​ പ്രധാനമാണെന്നും സി.ഇ.ഒ പറഞ്ഞു. അടുത്തിടെ ആഗോളതലത്തിൽ നടന്ന പഠനത്തിൽ ചൈൽഡ്​ കാർ സീറ്റുകളുടെ കൃത്യമായ ഉപയോഗത്തിലൂടെ കുട്ടികളിൽ 54 മുതൽ 71 ശതമാനം വരെ പരിക്ക്​ കുറക്കാൻ സാധിച്ചതായി കണ്ടെത്തിയിരുന്നു​. കൂടാതെ നാലു മുതൽ എട്ട്​ വരെയുള്ള കുഞ്ഞുങ്ങളിൽ ട്രാഫിക്കുമായി ബന്ധപ്പെട്ട പരിക്ക്​ 45 ശതമാനം കുറക്കാനും സഹായിച്ചു.

അതേസമയം, ഡ്രൈവിങ്​ വേളകളിൽ ട്രാഫിക്​ നിയമങ്ങൾ പാലിക്കണമെന്ന്​ അമ്മമാരോട്​ സി.ഇ.ഒ അഭ്യർഥിച്ചു. പത്ത്​ വയസ്സിന്​ താഴേയുള്ളതോ 145 സെന്‍റിമീറ്ററിന്​ താഴേയുള്ളതോ ആയ കുഞ്ഞുങ്ങളെ മുൻ സീറ്റിൽ ഇരുത്തുന്നത്​ 400 ദിർഹം പിഴ ലഭിക്കാവുന്ന കുറ്റമാണ്​.

കൂടാതെ അനുയോജ്യമായ ചൈൽഡ്​ സീറ്റില്ലാതെ നാലു​ വയസ്സിന്​ താഴെയുള്ള കുട്ടികളെ കാറിൽ കൊണ്ടുപോകുന്നതും 400 ദിർഹം പിഴ ലഭിക്കാവുന്ന കുറ്റമാണ്​.

ദേശീയ ദിന ആഘോഷ വേളകളിൽ ജനിച്ച കുഞ്ഞുങ്ങളുടെ അമ്മമാർക്ക്​ ചൈൽഡ്​ കാർ സീറ്റുകൾ വിതരണം ചെയ്യുന്നുചൈൽഡ്​ സീറ്റില്ലാതെ നാലു​ വയസ്സിന്​ താഴെയുള്ള കുട്ടികളെ കാറിൽ കൊണ്ടുപോകുന്നതും 400 ദിർഹം പിഴ ലഭിക്കാവുന്ന കുറ്റമാണ്​.