ആഘോഷങ്ങൾ വാക്​സിനെടുത്തവർക്ക്​ മാത്രം

ദുബൈ: യു.എ.ഇയിലെ ആഘോഷപരിപാടികൾ വാക്​സിനെടുത്തവർക്ക്​ മാത്രമാക്കുമെന്ന്​ ആരോഗ്യ മേഖല വക്താവ്​ ഡോ. ഫരീദ അൽ ഹൊസനി പറഞ്ഞു. കൂടാതെ, 48 മണിക്കൂറിനുള്ളിലെടുത്ത കോവിഡ്​ നെഗറ്റിവ്​ ഫലം ഹാജരാക്കണം. രാജ്യത്ത്​ ആഘോഷ പരിപാടികൾക്ക്​ അനുമതി നൽകിയ പശ്ചാത്തലത്തിലാണ്​ ആരോഗ്യ വകുപ്പ്​ നയം വ്യക്തമാക്കിയത്​.

കല, കായിക, സാംസ്​കാരിക, സാമൂഹിക പരിപാടികൾക്ക് ഈ നിബന്ധന​ ബാധകമാണ്​. അൽ ഹൊസൻ ആപ്​ ഡൗൺലോഡ്​ ചെയ്യുകയും ഇതിൽ 'ഇ' ചിഹ്​നം ലഭിക്കുകയും വേണം. രണ്ട്​ ഡോസ്​ വാക്​സിനെടുത്ത ശേഷം 28ാം ദിവസമാണ്​ 'ഇ' ചിഹ്​നം ലഭിക്കുക. എന്നാൽ, ഏഴ്​ ദിവസത്തേക്ക്​ മാത്രമേ 'ഇ' ചിഹ്​നം ഉണ്ടാവൂ. വീണ്ടും 'ഇ' ലഭിക്കാൻ പി.സി.ആർ ​പരിശോധന നടത്തണം. നെഗറ്റിവ്​ പരിശോധന ഫലം ലഭിച്ചത്​ മുതൽ ഏഴ്​ ദിവസത്തേക്ക്​ വീണ്ടും 'ഇ' ലഭിക്കും. പരിപാടികളിൽ പ​ങ്കെടുക്കുന്നവർക്ക്​ 'ഇ' ചിഹ്​നം നിർബന്ധമാണ്​. 48 മണിക്കൂർ മുമ്പുള്ള പരിശോധന ഫലവുമുണ്ടെങ്കിൽ മാത്രമേ പ്രവേശനം അനുവദിക്കൂ. ജൂൺ ആറ്​ മുതലാണ്​ നിബന്ധന ​​​പ്രാബല്യത്തിൽ വരുക.

വിവാഹം, ഹോട്ടലിലെ ആഘോഷങ്ങൾ, സംഗീത പരിപാടികൾ തുടങ്ങിയവക്കും അനുമതി നൽകി​. ജീവനക്കാരും വാക്​സിനെടുക്കണം. റസ്​റ്റാറൻറുകളിലും കഫെകളിലും ഷോപ്പിങ്​ മാളുകളിലും 70 ശതമാനം ശേഷിയോടെ തത്സമയ ആഘോഷ പരിപാടികൾ നടത്താം. ഹോട്ടലുകൾ തുറന്ന്​ പ്രവർത്തിക്കാം. എന്നാൽ, മാസ്​ക്​, സാമൂഹിക അകലം എന്നിവ നിർബന്ധം. ഹാളുകളിലെയും ഹോട്ടലുകളിലെയും വിവാഹ പരിപാടികൾക്ക്​ 100 പേരെ വരെ പ​ങ്കെടുപ്പിക്കാം. വീട്ടിലെ വിവാഹാഘോഷത്തിന്​ 30 പേർക്ക്​ മാത്രമാണ്​ അനുമതി. റസ്​റ്റാറൻറുകളുടെ ഒരു ടേബ്​ളിന്​ ചുറ്റും 10 പേർക്ക്​ വരെ ഇരിക്കാം. കോഫി ഷോപ്പുകളിൽ ഒരു ടേബ്​ളിൽ ആറു​ പേർ അനുവദനീയം.

ബാറുകൾ തുറക്കാനും അനുമതി നൽകി. കായിക പരിപാടികൾക്ക്​ ഗാലറിയുടെ 70 ശതമാനം ശേഷി വരെ കാണികളെ അനുവദിക്കാം. നേരത്തേ ഇത്​ 30 ശതമാനമായിരുന്നു. ഇൻഡോർ മത്സരങ്ങൾക്ക്​ പരമാവധി 1500 പേർക്കും ഔട്ട്​ഡോർ മത്സരങ്ങൾക്ക്​ 2500 പേർക്കുമാണ്​ അനുമതി.

78.11 ശതമാനം ജനങ്ങൾക്ക്​ വാക്​സിനെടുത്തതായി ഡോ. ഫരീദ പറഞ്ഞു. പ്രായമായവരിൽ 85 ശതമാനം പേരും വാക്​സിനെടുത്ത്​ കഴിഞ്ഞു.ലോകത്ത്​ ജനസംഖ്യയുമായി താരതമ്യം ചെയ്യു​േമ്പാൾ ഏറ്റവും കൂടുതൽ വാക്​സിൻ ഡോസുകൾ വിതരണം ചെയ്​തത്​ യു.എ.ഇയിലാണ്​. 100 പേരിൽ 124.31 എന്നതാണ്​ യു.എ.ഇയിലെ അനുപാതം. ഇസ്രായേലിനെയാണ്​ മറികടന്നത്​. ഇതുവരെ 12.29 ദശലക്ഷം ഡോസ്​ വാക്​സിൻ വിതരണം ചെയ്​തു.