കുടുംബസുരക്ഷ പദ്ധതി അപേക്ഷഫോറം ഉമ്മർ കോഡൂരിന് നൽകി സീതി കൊളക്കാടൻ ഉദ്ഘാടനം ചെയ്യുന്നു
ജിദ്ദ: മലപ്പുറം ജില്ല കെ.എം.സി.സി കമ്മിറ്റിയുടെ 2023-2024 വർഷത്തെ കുടുംബസുരക്ഷ പദ്ധതിയുടെ പുതിയ ആനുകൂല്യങ്ങളോടെയുള്ള അംഗത്വ കാമ്പയിന് തുടക്കമായതായി ഭാരവാഹികൾ അറിയിച്ചു. ജിദ്ദ കെ.എം.സി.സി സെൻട്രൽ കമ്മിറ്റി ജനറൽ സെക്രട്ടറി അബൂബക്കർ അരിമ്പ്ര പദ്ധതിയുടെ ഉദ്ഘാടനം നിർവഹിച്ചു. സൗദിയിൽ ആദ്യമായി കുടുംബസുരക്ഷ പദ്ധതിക്ക് തുടക്കംകുറിച്ച ജിദ്ദ മലപ്പുറം ജില്ല കെ.എം.സി.സി ഓരോ വർഷവും പുതിയ ആനുകൂല്യങ്ങൾ ഉൾപ്പെടുത്തി മുന്നോട്ടുപോകുന്നതുകൊണ്ടാണ് രണ്ടു പതിറ്റാണ്ട് കഴിഞ്ഞിട്ടും പദ്ധതി വിജയകരമായി കൊണ്ടുപോകാൻ സാധിക്കുന്നതെന്ന് അദ്ദേഹം പറഞ്ഞു.
കുടുംബസുരക്ഷ പദ്ധതിയുടെ അപേക്ഷഫോറം മലപ്പുറം മണ്ഡലം പ്രസിഡന്റ് ഉമ്മർ കോഡൂരിനു നൽകി ജിദ്ദ മലപ്പുറം ജില്ല കെ.എം.സി.സി ആക്ടിങ് പ്രസിഡന്റ് സീതി കൊളക്കാടൻ ആരംഭംകുറിച്ചു. ജനറൽ സെക്രട്ടറി ഹബീബ് കല്ലൻ പരിപാടിയിൽ സുരക്ഷപദ്ധതിയെക്കുറിച്ച് വിശദീകരിച്ചു. സുരക്ഷ പദ്ധതിയിൽ ചേർന്ന് പ്രവാസ വിരാമ പദ്ധതി പ്രകാരം നാട്ടിൽ പോകുന്ന പ്രവാസിക്ക് 25,000 രൂപ വരെ നൽകുന്ന പദ്ധതിയും ജീവിച്ചിരിക്കെതന്നെ ജോലി ചെയ്യാൻ സാധിക്കാത്ത രൂപത്തിൽ അപകടത്തിൽപെടുന്നവർക്ക് ഒരു ലക്ഷം രൂപ നൽകുന്ന പദ്ധതിയും തുടരുമെന്നും അദ്ദേഹം പറഞ്ഞു.
കഴിഞ്ഞ കാലയളവിൽ 95 പേർക്ക് പ്രവാസ വിരാമ പദ്ധതിയിൽനിന്ന് ആനുകൂല്യങ്ങൾ നൽകി. ജിദ്ദയിൽവെച്ച് മരിച്ച 14 പേർക്ക് മരണാനന്തര ആനുകൂല്യവും 46 പേർക്ക് ചികിത്സ ആനുകൂല്യങ്ങളും നൽകിയതായും പദ്ധതി ചെയർമാൻ ഇല്യാസ് കല്ലിങ്ങൽ അറിയിച്ചു.
ബാവ വേങ്ങര, ലത്തീഫ് മുസ്ലിയാരങ്ങാടി, നാസർ മച്ചിങ്ങൽ, മജീദ് പുകയൂർ എന്നിവർ സംബന്ധിച്ചു. സുൽഫീക്കർ ഒതായി, അബ്ബാസ് വേങ്ങൂർ, നൗഫൽ ഉള്ളാടൻ, ജാഫർ വെന്നിയൂർ, നാസർ മമ്പുറം, അഫ്സൽ നാറാണത്ത് എന്നിവർ പരിപാടിക്ക് നേതൃത്വം നൽകി. സാബിൽ മമ്പാട് സ്വാഗതവും വി.വി. അശ്റഫ് നന്ദിയും പറഞ്ഞു. മുഹമ്മദ് കല്ലിങ്ങൽ ഖിറാഅത്ത് നടത്തി.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.