ദോഹ: അടുത്ത വർഷം ഫെബ്രുവരിയിൽ ഖത്തർ വേദിയാകുന്ന ലോക അക്വാറ്റിക്സ് ചാമ്പ്യൻഷിപ്പ് ഉദ്ഘാടന ചടങ്ങുകളുടെ ടിക്കറ്റ് വിൽപനക്ക് തുടക്കമായി. ഫെബ്രുവരി രണ്ടിന് ഖത്തറിലെ വിവിധവേദികളിലായി ആരംഭിക്കുന്ന ലോകചാമ്പ്യൻഷിപ്പിന്റെ പ്രൗഢഗംഭീരമായ ഉദ്ഘാടനം നാലാം തീയതി ആസ്പയർ ഡോമിലാണ് നടക്കുന്നത്.
വൈകീട്ട് ആറു മുതൽ നടക്കുന്ന ചടങ്ങിനുള്ള ടിക്കറ്റ് വിൽപനക്കാണ് ഓൺലൈൻ വഴി തുടക്കം കുറിച്ചത്. ലോകോത്തര നീന്തൽ താരങ്ങളും, വാട്ടർ സ്പോർട്സ് അത്ലറ്റുകളുമെല്ലാം മാറ്റുരക്കുന്ന ചാമ്പ്യൻഷിപ് ഫെബ്രുവരി 18 വരെ നീണ്ടു നിൽക്കും. ഇതാദ്യമായാണ് മിഡിൽ ഈസ്റ്റിലേക്ക് ചാമ്പ്യൻഷിപ് എത്തുന്നത്. ഒന്നാം കാറ്റഗറി ടിക്കറ്റുകൾക്ക് 200 റിയാലും രണ്ടാം കാറ്റഗറി ടിക്കറ്റുകൾക്ക് 120 റിയാലുമാണ് നിരക്ക്.
ടിക്കറ്റ് വാങ്ങുന്നവർക്ക് അതേ ദിവസം നടക്കുന്ന ആർട്ടിസ്റ്റിക് സ്വിമ്മിങ് മത്സരത്തിനും സാക്ഷിയാകാവുന്നതാണ്. നീന്തൽ, ഡൈവിങ്, ഹൈ ഡൈവിങ്, ആർട്ടിസ്റ്റിക്സ് സ്വിമ്മിങ്, ഓപൺ വാട്ടർ, വാട്ടർ പോളോ ഉൾപ്പെടെ വിവിധ വിഭാഗങ്ങളിലായി 2500ഓളം താരങ്ങളാണ് മാറ്റുരക്കുന്നത്.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.