ദോഹ: പ്രവാസികളായി ഖത്തറിന്റെ മണ്ണിലെത്തി, ഇവിടെയും അതിശയങ്ങൾ കൊയ്ത്കൂട്ടിയവരാണ് ഇന്ത്യൻ വനിതകൾ. ജോലിതേടിയും കുടുംബിനികളുമായും ഇവിടെയെത്തി ഖത്തറിന്റെ മണ്ണിൽ തലയെടുപ്പോടെ തിളങ്ങിയ ഇന്ത്യൻ വനിതകളെ ആദരിക്കാനായി 'ഗൾഫ് മാധ്യമം' ഒരുക്കുന്ന 'ഷി ക്യൂ എക്സലൻസ് അവാർഡിലേക്ക് നാമനിർദേശ നടപടിക്രമങ്ങൾ സജീവമാവുന്നു. മേയ് 22 ഞായറാഴ്ച വൈകുന്നേരം ആറ് മണിവരെയാണ് ഓൺലൈൻ വഴിയും വാട്സാപ്പ്-ഇമെയിൽ വഴിയും നാമനിർദേശം സമർപ്പിക്കാനുള്ള അവസാന സമയം.
ഷി ക്യൂ അവാർഡിന്‍റെ ലോഗോ പ്രൗഢഗംഭീരമായ ചടങ്ങിൽ കഴിഞ്ഞ ദിവസം ദോഹയിൽ പ്രകാശനം നിർവഹിച്ചിരുന്നു.
വ്യത്യസ്തങ്ങളായ എട്ടു മേഖലകളിൽ ഖത്തറിൽ മികവു തെളിയിച്ച ഇന്ത്യൻ വനിതകൾക്കാണ് 'ഷി ക്യൂ എക്സലൻസ് അവാർഡ് 2022' പുരസ്കാരം സമ്മാനിക്കുന്നത്. രണ്ടു ഘട്ടങ്ങളിലായി നാമനിർദേശത്തിലൂടെയും, പിന്നെ സാമൂഹിക മാധ്യമങ്ങൾ വഴി പൊതു ജനങ്ങൾക്കിടയിലെ വോട്ടെടുപ്പിലൂടെയും വിജയികളെ തെരഞ്ഞെടുക്കും. ഖത്തറിൽ റെസിഡന്‍റ് ആയ ഇന്ത്യൻ വനിതകളെയാണ് പുരസ്കാരത്തിനായി നിർദേശിക്കേണ്ടത്.
രണ്ടു ഘട്ടങ്ങളിലായാണ് ഗൾഫ് മാധ്യമം 'ഷി ക്യൂ അവാർഡ് 2022' പുരസ്കാര ജേതാവിനെ തെരഞ്ഞെടുക്കുന്നത്. ആദ്യ ഘട്ടത്തിൽ നിശ്ചിത വിഭാഗങ്ങളിലേക്ക് അർഹരായവരെ സ്വന്തം നിലയിൽ നാമനിർദേശം ചെയ്യാവുന്നതാണ്. നിങ്ങളുടെ അറിവിലോ, സൗഹൃദ വലയത്തിലോ ഉള്ളവർ ഏതെങ്കിലും വിഭാഗങ്ങളിൽ മികച്ച സേവനം ചെയ്യുന്നവരും ആദരിക്കപ്പെടാൻ അർഹരുമാണെന്ന് വിലയിരുത്തുന്നുവെങ്കിൽ അവരെ അവാർഡിനായി നാമനിർദേശം ചെയ്യാം.
www.madhyamam.com/sheQ എന്ന ഓൺലൈൻ ലിങ്ക് വഴി വിശദാംശങ്ങളും, വ്യക്തിഗത വിവരങ്ങളും നേട്ടങ്ങൾ വിവരിക്കുന്ന രേഖകളും കുറിപ്പുകളും സഹിതം അപേക്ഷിക്കാം. +974 5066 3746 വാട്സാപ് നമ്പറിലും, sheqatar2022@gmail.com എന്ന ഇ മെയിൽ വിലാസത്തിലും അപേക്ഷ സമർപ്പിക്കാം.
മേയ് 22 വരെയാണ് നാമനിർദേശം സ്വീകരിക്കുന്നത്. തുടർന്ന് വിദഗ്ർ അടങ്ങിയ ജഡ്ജിങ് പാനൽ പരിശോധിച്ചായിരിക്കും ഓരോ വിഭാഗത്തിലെയും മൂന്നുപേരുടെ ചുരുക്കപട്ടിക പ്രസിദ്ധീകരിക്കുന്നത്.
ഇവരായിരിക്കും പൊതു വോട്ടിങ്ങിലേക്ക് പരിഗണിക്കപ്പെടുന്നത്. ഓരോ വിഭാഗത്തിലും ഫൈനൽ ലിസ്റ്റിൽ ഇടം പിടിക്കുന്ന മൂന്നു പേരാവും 'ഷി ക്യു അവാർഡ്' പുരസ്കാരത്തിന് മത്സര രംഗത്തുണ്ടാവുക.
ഓൺലൈൻ വഴിയുള്ള പബ്ലിക് വോട്ടിങ്ങിന്‍റെയും വിദഗ്ധർ അടങ്ങിയ ജഡ്ജിങ് കമ്മിറ്റിയുടെ തീരുമാനവും പ്രകാരമാവും അവാർഡ് ജേതാക്കളെ പ്രഖ്യാപിക്കുന്നത്. ജൂൺ 11ന് നടക്കുന്ന വിശാലമായ അവാർഡ് നൈറ്റിൽ പ്രഖ്യാപിക്കപ്പെടുന്ന ജേതാക്കൾക്ക് വിശിഷ്ടാതിഥികളുടെ സാന്നിധ്യത്തിൽ പുരസ്കാരം സമ്മാനിക്കും.
1 സാമൂഹിക സേവനം
2 കൃഷി
3 അധ്യാപിക
4 ആരോഗ്യ സേവനം
5 കല-സാഹിത്യം
6 സംരംഭക
7 സ്പോർട്സ്
8 മീഡിയ
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.