ഖത്തറിലെ 'അൽ അറബ്' ദിനപത്രം പുന:പ്രസിദ്ധീകരിക്കുന്നു

ദോഹ: അച്ചടി നിലച്ച ഖത്തറിലെ പ്രഥമ അറബി ദിനപത്രമായ 'അൽ അറബ്' പുന:പ്രസിദ്ധീകരിക്കാൻ സാധ്യത. ദാർ അൽ അറബ് പബ്ലിഷിംഗ് പ്രിൻറിംഗ് ഡിസ്​ട്രിബ്യൂഷൻ കമ്പനിയെ ദാർ അൽ ശർഖ് ഗ്രൂപ്പ് ഏറ്റെടുത്തതോടെയാണിത്​. ഡോ. ഖാലിദ് ബിൻ ഥാനി ബിൻ അബ്ദുല്ല ആൽഥാനിയുടെ അധ്യക്ഷതയിൽ ചേർന്ന ഡയറക്ടർ ബോർഡ് യോഗത്തിലാണ് ദാർ അൽ അറബിനെ ഏറ്റെടുക്കാൻ തീരുമാനിച്ചത്​.

അൽ അറബ് ദിനപത്രത്തിനായി പുതിയ സ്​ട്രാറ്റജിയും കാഴ്ചപ്പാടും തയ്യാറാക്കുന്നതിൻെറ ഭാഗമായാണ് തീരുമാനം. മാധ്യമരംഗത്തെ മാറ്റങ്ങൾക്കനുസൃതമായി അൽ അറബ്​ പത്രം പുനപ്രസിദ്ധീകരണം നടത്തുന്നതിനായുള്ള സമഗ്ര തയ്യാറെടുപ്പുകളും ദാർ അൽ ശർഖ് ഗ്രൂപ്പ് നടത്തി വരുന്നുണ്ട്.

ഖത്തറിലെ പ്രഥമ ദിനപത്രമായിരുന്ന 'അൽ അറബ്' 1972ലാണ് ദാർ അൽ അറബ് ഗ്രൂപ്പിന്​ കീഴിൽ പ്രസിദ്ധീകരണം ആരംഭിച്ചത്. സാങ്കേതിക കാരണങ്ങളാൽ അടുത്തിടെ പ്രസിദ്ധീകരണം താൽക്കാലികമായി നിർത്തിവെച്ചിരിക്കുകയാണ്​. ജൂലൈ ഒമ്പതിനാണ്​ ഓൺലൈനിൽ അവസാന പത്രം പുറത്തിറങ്ങിയത്​. അച്ചടി നേരത്തേ നിർത്തിയിരുന്നു. ദാർ അൽ ശർഖ് ഗ്രൂപ്പിന് കീഴിൽ ദിനപത്രം ഉടൻ പുനപ്രസിദ്ധീകരണം ആരംഭിക്കുമെന്നാണ് പ്രതീക്ഷിക്കുന്നത്. അൽ ശർഖ്, ദി പെനിൻസുല, ലുസൈൽ എന്നിവയും ദാർ അൽ ശർഖ് ഗ്രൂപ്പിന് കീഴിലാണ് പുറത്തിറങ്ങുന്നത്.