കുവൈത്ത് സിറ്റി: ജി.സി.സിയിൽ സ്വകാര്യ മേഖലയിലെ ഉന്നത തസ്തികകളിൽ ജോലി ചെയ്യുന്ന വിദേശികളിൽ താരതമ്യേന കുറഞ്ഞ ശമ്പളം പറ്റുന്നത് കുവൈത്തിലെന്ന് റിപ്പോർട്ട്. ആറു ജി.സി.സി രാജ്യങ്ങളെ താരതമ്യം ചെയ്ത് ‘ഗൾഫ് ബിസിനസ്’ മാഗസിൻ നടത്തിയ പഠന റിപ്പോർട്ടിലാണ് ഇക്കാര്യമുള്ളത്.
കുവൈത്തിലെ സ്വകാര്യ മേഖലയിലെ ഉന്നത തസ്തികകളിലുള്ള വിദേശികളുടെ ശരാശരി ശമ്പളം 7826 ഡോളറാണ്. സൗദിയിൽ ഇതേ തസ്തികകളിൽ ജോലി ചെയ്യുന്ന വിദേശികളുടേതിനേക്കാൾ ഒമ്പത് ശതമാനത്തോളം കുറവാണിത്. ഒമാൻ, ബഹ്റൈൻ എന്നീ രാജ്യങ്ങളിലെ വിദേശികൾ ഇതേ ജോലികൾക്ക് യഥാക്രമം 7846, 7867 ഡോളറുകളാണ് വേതനം വാങ്ങുന്നത്.
അതേസമയം, സ്റ്റാർ ഹോട്ടലുകളിലെ ഡയറക്ടർ പോലുള്ള തസ്തികകളിൽ ജോലി ചെയ്യുന്ന വിദേശികളുടെ ശമ്പളം താരതമ്യം ചെയ്താൽ കുവൈത്തിലാണ് കൂടുതൽ. 15,290 ഡോളറാണ് കുവൈത്തിലെ വിദേശ ഹോട്ടൽ ഡയറക്ടർമാരുടെ ശമ്പളം. ഇത് സൗദിയിലേതിനേക്കാൾ 38 ശതമാനം അധികമാണ്. 10,404 ഡോളറാണ് സൗദിയിൽ ഈ ജോലിക്ക് വിദേശികളുടെ ശമ്പളം. യു.എ.ഇയിലെ വിദേശികൾ ഈ ജോലിക്ക് വാങ്ങുന്നത് 9741 ഡോളറാണ്. കുവൈത്തിൽ ഇത്തരം ജോലികൾക്ക് വിദേശികൾ വാങ്ങുന്ന ശരാശരി ശമ്പളം 8083 ഡോളറാണെന്ന് മാഗസിൻ റിപ്പോർട്ടിൽ പറയുന്നു. ഇത് കഴിഞ്ഞ വർഷത്തേതിനേക്കാൾ 26.3 ശതമാനം കുറവാണ്.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.